GANAHAN si Miami Heat coach Erik Spoelstra nga makig-uban si Manny Pacquiao sa NBA back-to-back champions apan iyang giklaro nga wala sa iyang panglantaw nga ilakip sa coaching staff ang kanhi boxing 8-time world champion.

“That won’t happen, but I’d love to have him come out and spend some time with the

team,” matod pa ni Spoelstra sa interbyu sa AFP.

Dili pa lang dugay, gibutyag ni Pac­quiao nga plano niyang mahimong playing coach sa expansion team sa Philippine Basketball Associa­tion (PBA) nga mao ang Kia Motors.

Apan gumikan kay kinahanglan man siyang moagi sa rookie draft kon mag-playing coach siya, nakahukom kining magtutok na lang sa coaching.

Ning bag-uhay lang, opisyal nang giannusyo sa Kia nga ang Pam­bansang Kamao sa Pilipinas maoy gikuha nilang coach. Ang team tawgon og Kia Kamao.

Si Pacquaio mipasabot nga sukad pa sa iyang pagkabata, sa wala pa siya makat-on sa duwa nga boksing, mahiligon na siya sa basketball.

Tungod niini, gipasabot ni Spoelstra nga wala siya mahibulong kon mahilambigit si Pacquiao sa professional basketball.

“It doesn’t surprise me,” pamaha­yag ni Spoelstra, kinsa usa ka Fil-Am.

“He plays pickup all the time. But I’m sure (boxing trainer) Freddie Roach doesn’t appreciate that.”

Inig human sa National Basketball Association (NBA) 2013-14 season, si Spoelstra mobisita og balik sa Pilipinas aron mopahigayon og basketball clinics.

Nanghinaot si Spoelstra nga sa iyang pagbisita og balik sa Pilipinas, personal siyang makasaksi og duwa sa KIA Kamao sa PBA. (Genevieve T. Fernandez, USJ-R MassCom Intern)