ANG hulagway sa tulo ka mga senador nga sila si Juan Ponce Enrile, Jinggoy Estrada ug Bong Revilla nga nagbansiwag sa mga mantalaan sa niaging adlaw nga kunohay mapahiyumon naghatag og laing kahulogan ngadto sa publiko.

Siguro nagtuo ang tulo nga sa ilang pagbuhat sa ingon mosantop sa hunahuna ngadto sa mga tawo nga sila inosente tungod kay ila mang gipakita nga wa sila mahulga ug matarog sa kasong plunder nga gipasaka batok kanila.

Dili kini maoy unang higayon nga ilang gihimo. Sa kasaulogan sa adlaw nga natawhan ni Estrada niadtong Pebrero 17, ang tulo mipakita usab sa kamasanagon sa ilang panagway ug alegre nga nagselebrar taliwala sa kontrobersiya.

Apan ang wa nila mapangagpasi mao ang kasalikwaot sa ilang gibuhat. Imbis mangita og mga mosimpatiya kanila, ang kalagot ug kasagmuyo sa kinabag-an nga nagtan-aw sa maong hulagway mao na hinuon ang mipatigbabaw.

Kini tungod kay samtang seryuso ang mga tawo nga nagsunod sa maong kaso kay lagi naglakip man kini sa binilyon nga kuwarta sa gobiyerno, mahulagway nga daw sa ila na hinuon kining gikataw-an ug giyamayama-an.

Ang ilang pagpangawat ug pagpangilad sa pundo sa panudlanan sa gobiyerno nga hinaguan mga tawo maoy anaa karon sa alimpatakan sa kadaghanan.

Dili ang pagpahiyum ug pagbahakhak atubangan sa katawhan maoy makapapas sa pagduda nga sila nakakurakot og minilyon ka pesos gikan sa ilang pork barrel funds.

Ang pagpakita sa ilang mga dokumento nga ikatugbang usab sa mga ebedensiya nga nakuha sa Commission on Audit (COA) batok kanila maoy gipaabot sa publiko nga sa ilang ngalan usab kini makalimpyo.