NAGBITAY ug wala nay kinabuhi ang usa ka babae human napalgan sa ka boardmate niini nilabay’ng adlaw sa Purok 1, Barangay Kisolon lungsod sa Sumilao, Bukidnon.

Giila ang biktima nga mao si Liza Mae A. Balaso, 26, single parent, nagtrabaho isip tigluto kon cook sa Kahayunan Restaurant sa Local Government Unit sa lungsod sa Impasug-ong, susamang probinsya.

Sa inisyal nga imbestigasyon ni PO3 Rey Paculba sa Sumilao Police Station, nasuta nga ang biktima igo lamang nag-abang sa boarding house nga gipanag-iyahan sa usa ka Marilou Sambo. Maoy nakita sa iyang ka boardmate nga mao si Chelly Rose Paguera nga naghikot og pisi ang biktima ug gihikot niini sa haligi sa atop ug nagbitay na kini nga walay kinabuhi.

Ang kapolisan nga miresponde dili pa masuta kung adunay bay foul play sa kamatayon niini hinoun ilang nakita nga nagmarka pag-ayo ang pisi sa liog sa biktima.

Giimbestigahan pa usab sa kapolisan kung unsa ang mga rason nganong naghikog ang biktima tungod kay giingong namatikdan nga kanunay kining problemado ug gahinuktok.