SA WALAY puas nga operasyon nga gihimo sa kapolisan sa Police Regional Office-Northern Mindanao ubos sa mando ni Chief Superintendent Isagani Genabe Jr., moabot sa 57 ka mga tao nga nalambigit sa nagkalain-laing krimen ang ilang nasikop sulod lamang sa duha bulan sa Abril ug bulan Mayo ning tuig.
Mokabat sa siyam ka mga operasyon ang gihimo batok sa illegal nga druga diin naaresto ang mokabat 23 ka tao nga miresulta usab sa pagkasakmit sa mokabat 2,010.77 ka gramo sa gituohang shabu nga adunay gibana-banang kantidad nga P14 milyones kapin.
Moabot usab sa 5 ka pakete kon tea bag sa uga nga marijuana. Alang usab sa operasyon batok sa illegal nga sugal, adunay mokabat 7 ka tao ang naaresto ug moabot sa P48 mil ang nakumpiska nga mga illegal gambling parapahernalia.
Samtang sa usa ka operasyon ang gihimo batok sa illegal logging. Sa operasyon usab batok carnapping, adunay usa ka motorsiklo ang narekober.
Upat usab ka tao ang naaresto human naghupot sa ginadili nga armas sama sa usa ka unit nga kalibre 38, ug upat ka kalibre 45 nga pistol.
Mokabat usab 24 ka mga operasyon ang gihimo aron isilbi ang mga adunay mga warrant of arret diin 27 ka mga wanted person ang nasikop. Moabot usab sa 581 ka mga checkpoints ang gipahigayon labina ang nakasupak sa “No Plate No Travel Policy.
Mga nadakpan nga mga suspetsado ang anaa na sa nagkalain laing istasyonan sa kapolisan.