NAKABSAN sa kinabuhi ang usa ka lalaki human giingong giunay og luba sa kainom niini niadtong Miyerkules sa kaadlawon sa Barangay Kimaya, lungsod sa Jasaan, Misamis Oriental.

Giila ang biktima nga mao si Marlon Dela Cruz, 38, minyo, residente sa dapit.

Samtang gitumbok nga suspetaso mao si Angelo dela Torre, hingkod ang edad, giingong silingan sa biktima.

Sa inisyal nga report sa Northern Mindanao Medical Center (NMMC) ning siyudad sa Cagayan de Oro, diin gidala si Dela Cruz, nasuta nga ang biktima niadtong Martes sa gabii nag-inom kuyog si Dela Torre.

Naabtan og kaadlawon ang duha sa sige og inom apan dihang pulos lango na sa ilimnong makahubog, daw kalit nga nagbikil sa storya ang duha nga miresulta una og sukmagay.

Daw kalit lang mikuha og kutsilyo si Dela Torre dayon daw luba sa biktima, hinungdan sa pagkaigo sa iyang kilid nga bahin sa dughan.

Gitabang ang biktima ug gisuwayan pa og dala sa NMMC apan pipila ka oras sulod sa balay tambalanan nakabsan sa kinabuhi ang biktima. Ang suspetsado ang gipangita na sa kapolisan sa Jasaan Police Station human kini makasibat atol mismo sa insidente. (SVB)