PITO ka mga kawani sa Cebu City Government ang nasutang tiggamitan og illegal nga drugas atol sa random drug test kagahapon nga gipahigayon sa mga personnel sa City Office for Substance Abuse Prevention.

Si Dr. Alice Utlang, exe­cutive director sa Cosap, nagkanayon nga pulos mga lalaki ang napalgan nga positibo sa ‘shabu’ sa buwan sa Hunyo.

Ang executive director nagdumili pagbutyag kon unsa nga department sa Cebu City Hall ang gipaubos og random drug test sanglit pipila ra sa mga kawani ang nipaubos og drug test.

Siya nabalaka nga da­li rang mailhan kon iyang ipublikar.

Ang Cosap adunay pa­dayon nga programa aron mapasabot ang mga ka­wani sa Cebu City Government may kalambigitan sa di maayong ikadalit sa pag­­gamit og ginadili nga drugas.

“Sayang kay wa sila ma­minaw ug gibutang sa (ilang) kasingkasing ang among gi-lecture sa ila kay kining na-positive humana ilang department ug office nga conduct namo ang information campaign on drugs,” matod ni Utlang sa text nga iyang gipadala sa Sun.Star Superbalita.

Gipadayag sa pangulo sa Cosap nga andam gihapon ang ilang buhatan pagtabang ngadto sa mga nagumon sa ginadiling drugas.