YEHEE. It's Friday. Sugdi ang buntag nga paghunahuna og mga positibong butang, friends, aron di bug-at sa atong paminaw samtang gahimo sa mga gimbuhaton sa palibot.

Padayon sa atong panaghisgot, friends, mahitungod sa Independence Day. Kagahapon, mga higala, didto sa Naga City misalmot si Pangulong Benigno Aquino III sa Independence Day rites.

Sumala ni deputy presidential spokesperson Abigail Valte nga buot sa pangulo nga suruyon ang mga dapit diin didto nahitabo ang pipila ka makasaysayanong panghitabo sa Pilipinas.

Sa miaging tuig, sa Kawit Cavite ug sa Tarlac ni P-Noy gisaludohan ang pipila ka beterano nga anaa sa maong paghinumdom.

Giingon ni Valte nga ang dakbayan sa Naga dunay 15 ka mga martyr niadtong 1896 sa gubat sa Pilipinas nga gikan sa Bicol region.

Sama sa pagwagayway ni Emilio Aguinaldo sa bandila sa Pilipinas didto sa Alapan, Kawit, Cavite niadtong 1898, mao na sab ang pagbati nato sa usa ka dakong garbo diha sa atong mga dughan sa kagawasan nga di mabawi karon.

Mga friends, ania atong mga nahinabi, ug happy weekened ninyong tanan!

Sakripisyo

"Dapat i-celebrate gyud nato ang Independence Day, di na kinahanglan ipasayod sa katawhan kung unsaon nato pag-celebrate. Ang importante diri nga di nato kalimtan ang sakripisyo nga gibuhis sa atong mga bayani alang sa nasud," ~ Michael Mico Liberato, Proprietor, Samal Island Delicacies, Igacos

Pagrespeto

"Angayan lang nga atong hatagan og pagtagad kini nga panahon kay dili kabayran ilang nahimo sa una. Kini nga adlaw, usa sab sa pagpahinumdom nga hatagan nato'g importansya ang pagrespeto sa kaugalingon ug ngadto sa ubang tawo," ~ Garry Atilano, Self-employed, Barangay 23-C, Isla Verde, Davao City

I-saysay

"Simple lang, kay importante siya nga adlaw sa atong history. Sa pag-celebrate ra kita makahatag og pasalamat kanila. Himuon na lang nato kining unod sa istorya ngadto sa pagsaysay sa kabataan aron masayod sila kung unsa kamahinungdanon ang pagpagawas sa katungod ug ang pag-angkon sa kagawasan," Joefrech Luga, Graphic designer, 8telcom, Davao City