DIGOS CITY - Gisaulog sa nagkadaiyang lokal nga kagamhanan sa Davao del Sur ang ika-116 nga tuig isip paghandum sa adlaw sa kaugalingnan (Independence Day) kagahapong adlawa.
Mihimo og flag raising ceremony ang mga lokal nga munisipyo sa probinsiya ug sa siyudad sa Digos apil ang hut-ong sa Philippine National Police.
Dinhi sa dakbayan, nanguna si Mayor Joseph Peñas sa usa ka hamubong programa diin gitambungan sa mga kawani ug mga department heads sa lokal ug nasyonal nga ahensiya sa kagamhanan.
Si Peñas nga gihinabi sa Sun.Star Superbalita miangkon nga wa pa gyud hingpit nga naangkon sa matag usa ang kagawasan tungod kay aduna gihapo'y mga panahon nga buot manlupig sa pipila ka mga opisyal sa gobyerno.
Sa mga mamahayag, nga apektado sa mga buot mokutlo ug moputol sa gawasnong pamahayag, matud ni Peñas nga buot niya nga mao kini ang tutukan sa kapulisan.
Bisan si Bise Mayor Rey Hermosisima, miangkon nga wa pa gyud hingpit naangkon ang demokrasya ilabi na panahon sa piliay sanglit adunay mga politikong manghulga sa mga botante.
Apan nanghinaut ang mga dagkong opisyal sa dakbayan nga magmalinawon ang nasud samtang giatubang ang mga isyung politikal sama sa pork barrel scam.
Si Zenaida Guya, school supervisor sa Oriental District sa Department of Education (DepEd), nagbutyag nga sa kanunay ilang gipahinumdom sa mga tinun-an ang pagkamahinungdanon sa paghandom sa adlaw sa kaugalingnan.
Hinuon sa kinatibuk-an, nahimong malampuson ug malinawon ang selebrasyon sa Independence Day, matud sa Digos City Police Office (DCPO).
Gikanayon ni Supt. Querubin Manalang, hepe sa DCPO, nga importante kaayo ang kasaulogan tungod kay dinhi kita nahimong gawasnon gikan sa mga langyaw.
Bisan si Davao del Sur Provincial Police Director Senior Supt. Michael John Dubria nagbutyag nga kinahanglang hatagan og dakong bili ang adlaw sa kagawasan human ang katawhang Pilipino giulipon sa mga banyaga.
Ang tema sa kasaulogan nagkanayon, "Pagsunod sa yapak ng mga bayaning Pilipino, tungo sa malawakan at permanenteng pagbabago". (Orlando B. Dinoy)