KORONADAL CITY - Nagsubo karon ang pamilya sa 14-anyos nga tinun-an human nga niluog nga gipatay sa tulo ka mga karnaper alas 7:00 sa gabii niadtong Miyerkules didto sa Barangay Klinan-6, Polomolok, South Cotabato.
Giila ang biktima nga si Nur Adsan Bodi, taga-Barangay Lumakil,
Polomolok.
Sa pakighinabi sa uyoan sa biktima, gisaysay ni Lumakil Councilor Jolin Macaludos nga dunay tulo ka mga lalaki nga gustong magpahatud sa iyang ig-agaw nga si Raden Macaludos gikan sa Poblacion Polomolok padulong sa Barangay Cannery sa maong munisipyo.
Kantidad sa P30 ang gitanyag nga bayad sa tulo ka mga lalaki apan mibalibad si Macaludos tungod nagsakit matud pa ang iyang ngipon.
Hinungdan nga nagboluntaryo na lang si Bodi nga siya ang mohatud sa mga pasahero aron nga aduna siyay balon nga kuwarta sa iyang pagtungha.
Apan wala na nakabalik ang biktima ug pagkaugma na siya nga nakaplagang wala nay kinabuhi ug wala na usab ang gimaneho niyang motorsiklo.
Nakaangkon ang biktima og lima ka mga samad-dinunggaban ug gituohang gibundakan pa og bato ang ulo ug ang nawong.
Sa gihimong hot pursuit operation, nasikop sa mga otoridad ang tulo ka mga suspek sa Bianan, T'boli nga giilang sila si Sabal Musanip, taga-Isulan, Sultan Kudarat, Abdul Uyik, 40 anyos, taga-North Cotabato, ug si Jun Masu.
Gidakop sab ang tag-iya sa balay nga gidayunan sa mga suspek nga si Jonathan Balagan, 24 anyos, taga-T'boli tungod apil matud pa siya sa krimen.
Gisang-at na ang kasong carnapping ug pagpatay batok sa mga suspek nga gibalhog karon sa tangkalan sa kapulisan sa Polomolok. (Edgar Fuerzas)