DAVAO CITY - Mikabat sa 28 ka mga aplikante ang nadawat dayon sa

giaplayan nga trabaho alas 11:00 sa buntag kagahapon atol sa 2014 Kalayaan Job Fair nga gipasiugdahan sa Department of Labor and Employment (Dole 11) sa NCCC Mall of Davao.

Sa gipadangat nga mensahe sa text ni Dole 11 labor communication officer Sherwin Manual, sa total nga HOTS (hired-on-the-spot), 26 kanila ang na-hire sa lokal nga kompanya samtang duha kanila nadawat sa overseas agencies.

Alas 11:00 sa buntag pa lang, ang Dole 11 nalista og 877 rehistradong aplikante, 790 kanila alang sa lokal nga kompanya ug 87 alang sa overseas companies.

Sa 877 ka mga rehistradong aplikante, 335 kanila ang kwalipikado alang sa interview sa lokal nga trabaho samtang 34 alang sa oportunidad sa gawas sa nasud.

Mikabat sa 22,181 ka mga bakanteng trabaho gikan sa 113 ka mga lokal ug overseas nga kompanya ang bukas kagahapon.

Sa maong gidaghanon sa trabaho, 5,593 ka mga bakante gikan sa 79 ka lokal ug 16,588 bakante alang sa 34 gawas sa nasud.

Sama sa unang mga job fairs, daghan og bakante ang call center agents, customer service representatives, service crew, office staff, administrative clerk, carpenter, market sales person, accounting assistant, insurance salesman, ug non-formal education teacher.

Si Dole 11 regional director Joffrey M. Suyao nagsulti nga nagtinguha sila nga makuha ang 15 porsiyento sa total nga kuwalipikadong aplikante nga makatrabaho.

"There are some who are not qualified and they will be referred to validators for skills trainings, livelihood, or to the Philippine Employment Service Office (Peso) desk, since they also have other employers that can be referred to them," suma niya.

Ang one-stop shop gibutang sab atol sa job fair nga gilangkuban sa SSS, PhilHealth, Pag-Ibig, National Bureau of Investigation, Department of Foreign Affairs, National Statistics Office, Tesda, ug mga sakop sa Regional Coordinating Council. (Reuel John F. Lumawag)