GITAMBAGAN ni Davao City Mayor Rodrigo R. Duterte ang taxi driver, kinsa giakusahang nag-spray og kemikal dayon gikawatan iyang pasahero, nga mupasaka og kaso kon dili gyud siya ang naghimo sa krimen.
Ang mayor mipaguwa sa maong tambag luyo sa apela sa pamilya sa taxi driver nga si Santos Descallar Diez, 53, nagpuyo sa Barangay Tigatto, Buhangin District, ning siyudad.
Gawas sa apela sa kabanay, nagkadaiyang opinyon sa katawhan ang miguwa sa Facebook page sa Davao City Public Safety and Security Command Center (PSSCC).
Si Diez gidemanda og kasong robbery sa biktima nga si Jesus Famacion Dizon II, 39, pastor, nagpuyo sa Central Park sa Bangkal.
Si Duterte, human nakigkita sa nagreklamo didto sa Marco Polo Hotel niadtong Miyerkules sa gabii, nagsulti nga tungod kay dunay reklamo ang complainant, gihimo lang sa pulis ang ilang trabaho.
Apan, suma ni Duterte, kon wa gyud gihimo sa akusado ang krimen nga gipasangil kaniya, mamahimo siyang modemanda sa pastor.
"It will be up to the court to determine who is telling the truth," sulti ni Duterte.
Si PSCC head retired General Francisco Villaroman unang nagpatik sa iyang official Facebook page nga kinahanglan nga dunay "tracker team" nga himuon sa Davao City Police Office (DCPO) nga pangulohan ni Sr. Supt. Vicente D. Danao, aron sutaon ang tanang anggulo sa kaso lakip na ang katahap nga di tinuod ang alegasyon.
Si Villaroman nagsugyot niini human miangkon ang otoridad nga way lig-on nga ebidensiya nga gipresenta sa pastor.
Ang nahitabo ni Dizon niadtong Sabado sa gabii, ikaduha na nga nahitabo kaniya sanglit nabalita na sab siya nga gitulis sa taxi driver nga iyang gisakyan didto sa Mandaue City, Cebu niadtong Septyembre 2006.
Si Danao, sa laing bahin, misaad nga molusad og dugang imbestigasyon sa maong kaso.
Gipaneguro sab niya ang patas nga imbestigasyon.
Ang kapulisan sa Talomo maoy nagdala kang Diez kang Prosecutor Panfilo Junior R. Lovitos alas 9 sa buntag, Martes, human siya giaresto sa kapulisan tungod sa pasangil sa pastor.