DEAR Papa Joe,

Ako si Edmar, taga Talisay City, minyo. Mao kini ang akong suliran karon. Driver ra ko og traysikol. Naninguha ko og maayo para mahatag nako sa akong pamilya ang inadlaw-adlaw nilang kinanghalanon apan pakyas ko kay kuwangon gyud. Mao nga magsige na lang mi og away sa akong asawa. Apan wala ko masayod nga nakig-istorya diay siya sa iyang mama didto sa Manila ug gikuha siya kay adto na lang patrabahuon.

Tungod lagi sa akong mga pagkuwang nitugot ko. Unang buwan maayo ang dagan sa among komunikasyon. Gibilin niya nako ang duha namo ka mga anak. Pero nag-anam-anam na og kabati ang tanan hangtod nga niuli siya og kalit sa Cebu ug nahibulong ko sa iyang kausaban. Niuli siya kay kuhaon niya ang mga bata kay di kuno ko ka provide ug usa pa dili mi kasado ug kaya niya idangop sa DSWD.

Sakit kaayo kay wala koy nahimo kay kuyog man niya iyang mga igsuon nga mga laki nga isog kaayo. Nasayran nalang nako nga ang akong asawa karon usa na ka GRO ug ni-text siya nako na nangayo og pasaylo kay lagi dili gyud mahimo nga magka kami kay dugay na kuno niyang ampo nga mawala sila sa akong puder kay grabe na ang iyang pag-antos.

Sa tinuod lang nakahuna-huna ko nga maghikog nalang. Sak­to ba kaha kining akong buhaton? Tambagi intawon ko.

EDMAR

Edmar,

Wa kay katungod na mokutlo sa imong kinabuhi. Talawan ra kaayo ka kon imo nang buhaton. Samtang buhi pa ang tawo, naay pag­laum. Di sa ingon nga kay nawagtang ang imong pamilya, katapusan na kana sa imong kalibutan. Walay kalahi-an na sa mga nabiktima sa bagyo ug linog nga nahanaw ang ilang pamilya. Magpasalamat ka kay pwede pa nimo silang makita ug mausab ang dagan sa inyong istorya. Kadtong sila nga nitaliwan ang pamilya, dili na.

Dawata na lang na nga mao gyud na ang gusto sa imong asawa. Wa ka maggunit sa ilang hunahuna ug di ta kabuot. Taas pa kaayo ang panahon ug basin dili gyud to siya para imo ug naa pay moabot nimo. Ang panahon ra ang mag-igo ug kon kanus-a mo magkita pagbalik sa imong mga anak. Pero kon maninguha ka, ikaw mismo pwede nimong buhaton ang pakigkita sa imong mga anak.

Ayaw ipakita nga luoy ka. Ipakita nga kaya nimo ang challenge. Ang Ginoo galantaw sa mga tawo nga maayo ang binuhatan. Daghang salamat.

PAPA JOE

(sa inyong tampo ipadala sa papajoelon@hotmail.ph)