Manny Rabacal

Pakabana

SUMALA ni Pablo Villaber, chairman & chief executive officer (CEO) sa Malayan Integrated Industries Corp. (MIIC) nga sa dili madugay mahimo nang usa ka siyudad ang lungsod sa Cordova, Cebu.

Ang MIIC uban sa mga partner niini nga SM Investment Corp., Hyundai Corp., Mitsui Construction Development Corp., China Harbor Corp. ug China Hierbie Corp. maoy mougmad sa Cordova.

Ang ilang Cordova Reclamation Development Project maoy mohimo sa 3,500 ka ektaryang

reclamation project. Ang pag-riprap ug diking niini sugdan na sa dili madugay.

Molungtad kini og unom ka buwan ngadto sa usa ka tuig nga mogasto og P1 bilyon.

Magbutang usab sila og Cordova Private Industrial Estate and Economic Development and Export Processing Zone. Ang mga proyekto niini mao ang domestic/international port and pier zone (10 kms.).

Magtukod usab sila og taytayan gikan sa M. J. Cuenco Ave. dugtong sa Shell island (1 km.) ug ang Cordova-Getafe, Bohol bridge nga mokostar og P22 bilyones uban sa panabang ni Kong. Ares Aumentado kang kinsang amahan, anhing Kong. Erico, maoy nagplano niini.

Kining duha ka mga taytayan component sa Cordova reclamation.

Motuyhakaw na unya sa Cordova reclamation ang mga commercial center, theme park ug mga residential area.

Mao kining nagtuo si Pablo Villaber nga mahimo nang siyudad ang Cordova diin makahatag kinig daghang trabaho ug dakong buhis sa maong dapit.

PRISOHAN SA MGA SENADOR

Daghang wala magtuo nga mapriso gayud sila si Sen. Juan Ponce Enrile, Sen. Jinggoy Estrada ug si Bong Revilla sa sumbong plunder nga gipasaka na sa Ombudsman ngadto sa Sandiganbayan.

Kining tulo ka mga senador gipasa­kaan og sumbong uban kang Janet Lim Napoles nga gituhoang maoy utok sa pork barrel scam. Anaa usay daghang kiha nga gipasaka sa ubang mga tawo nga apil nii­ning scam apan graft lang kini.

Gisuportahan usab sa katawhan kining paghimog special court nga maoy mohawid sa mga kaso kalabut sa pork barrel scam.

Kon dili hatagan og temporary restraining order sa Korte Suprema, bulahon ang maong kaso kon asang division sa Sandiganbayan mapunta ang maong kaso. Kon makita nila nga adunay probable cause mo-isyu dayon kini og warrant of arrest.

Kon madakpan ang tulo ka mga senador ug si Napoles dili sila makapiyansa kon lig-on gayud ang e­bidensiya batok kanila.

Sa ato pa, kalabuso sila si Enrile, Estrada, Revilla ug Napoles.

Sumala pa sa gobiyerno dili kuno hatagag og special treatment ang maong mga senador.

Apan sa samang higayon ilang gipahibawo nga ila nang giandam ang prisohan sa tulo.

Kon way special treatment, ang ilang selda bisan ilahi sa ubang mga priniriso, kinahanglang anaa ra gihapon duol sa mga piniriso sa New Bilibid prison.

Kon mahitabo kini mopakpak ang katawhan uban sa pagsulbong sa ilang pagsalig sa atong sistema sa hustisya. (msr1144@yahoo.com)