NIADTONG mga bata pa ta, hagiton gani og sumbagay sa atong kaduwa unya dili sa mosukol, tawgon o sug-sugon dayon ta nga “ah, puti’g itlog.” Buot ipasabot nga talawan. Kining itlog depende man siguro na sa panit usab sa tawo. Kon puti imong panit, puti pod imong itlog. Kon itum ka og pamanit, lagum pod imong itlog. Pero unsa-on pag-ila ana nga tua man na sa sulod? Gawas lang og atong abrihan.

Puti’g itlog. Mao ni ang a­kong paghulagway niining li­ma ka mga piskal nga nag­langkob sa panel nga maoy nagpahigayon og preliminary investigation sa kasong pag-ambush patay ni Atty. Noel Archival ug duha ka mga kauban. Ang maong investigating panel nakahukom nga mo-inhibit sa ilang kaugalingon sa walay klarong rason. Dili na sila mopadayon sa paghupot sa maong kaso.

RASON

Ang gipangkiha mao ang kanhi mga opisyal sa Highway Patrol Group (HPG 7) nga ato na karon gipanglabay sa kaulohan. Ang ilang abogado nga si Atty. Inocencio Dela Serna nisang-at og motion for inhibition sa maong five man panel. Laing suwat usab nga gipadala ni Dela Serna kang Justice Secretary Leila de Lima nga nag-awhag nga mo-inhibit ang maong mga piskal kay basin og ma-inpluwensiya sa banay’ng Archival labi pa kay konsihal ang igsuon sa gipatay’ng abogado nga si Nestor Archival. Gusto ni dela Serna nga ang mga prosecutor ng mohupot gikan sa kaulohan ug gani gusto niya nga adto ipahigayon ang bisan unsang preliminary investigation. Di pod ta makabasol ni Dela Serna kay iyan man usab kanang katungod. Nahibawo man mo sa mga taktika sa mga abogado.

Ang rason ni Provincial Prosecutor Jane Petralba nganong mi-inhibit sila gumikan kuno kay gi-akusahan silang adunay pagpihig ug nagpakitag interes sa kaso. Kon walay igong legal nga basihanan, nganong mo-inhibit man sila? Gumikan sa pagduda lang? Pastilan ning rasona, morag wa gyuy ayo. Wala man kahay legal nga basihanan og nganong mo-inhibit man mo? Maayo unta og nasuta nga adunay sakop sa panel nga paryente ni Archival o ba kaha kanhi law partner niya o ba kaha brod niya sa Alpha Phi Omega.

Kanang pagduda dili nato na kalikayan, Prosecutor Petralba, Mam. Ipapruweba na nila.

Morag nasulod mo sa laang ni Atty. Dela Serna da.

HULIPAN

Ang inyo untang gihimo, Piskal Petralba nga naghuwat mo og mandu-an sa inyong labaw nga mo-inhibit mo. Apan matod pa ni Petralba nga dili pa kuno final ang ilang desisyon ug puwede pa nga mo-file og motion for reconsideration ang banay’ng Archival pinaagi sa ilang private prosecutor. Pastilan, inyo lang gyud nga gilangay-langay ning kasoha.

Inyo man unta kining igsuon si Atty. Archival sa propesyon. Pag-sure mo diha uy.

Mobarug mo diha og unsay para ninyo maoy labing matarong. Dili kay mokakak mo. Mga walang bayag, sa Tagalog pa. (bobby.nalzaro@yahoo.com)