GRABE ang mga anti-drug operation sa mga awtoridad ning pipila ka mga adlaw nga nakalabay.

Human giingong gi-ambush sa grupo ni kanhi PO1 Owen Rosales ang hepe sa Ubay, Bohol, nipahigayon gilayon ang kapulisan og follow-up operations. Na­ngamatay ang unom ka mga tawo, lakip na ni Rosales, sa giingong engkwentro sa usa ka resort sa Bien Unido.

Sayo usab ning semanaha, na-intercept sa Phi­lippine Drug Enforcement Agency (PDEA) ang P8 mil­yunes nga shabu ug nasikop ang inahan ug anak nga taga Brgy. Lorega San Miguel, dakbayan sa Sugbo.

Human sa PDEA, ang Police Regional Office nakasakmit usab og P2.5 milyunes nga balor sa shabu gikan sa duha ka mga babaye sa usa ka buy-bust operation sa Brgy. Labangon.

Sunodsunod nga mga kalampusan batok sa drugas nga makapalipay sa katawhan nga nabalaka

sa epekto niini sa katilingban.

Apan naandan na ra ba nga basta dunay bag-ong opisyal nga moasumer, naa dayon ang dagkong mga operasyon kay lagi kuno, “Oplan Pakilala.”

Pulong ni nga nagpasabot nga nagpaila ang usa ka opisyal nga siya na ang bag-ong hawod, busa adto na niya ang tanang mga ‘grasya.’

Hinaut pa nga di oplan pakilala ang mga operasyon ning nanglabay nga mga adlaw ug kini tinud-anay.

Isipon unta sa kapulisan nga leksyon ang nahi­tabo sa tulo ka mga pulis sa Bohol ug kang Chief Insp. George Caña, hepe sa Ubay police nga nailang anti-drug crusader. Kon pasagdan ang pagkuyanap sa drugas, bisan ang mga awtoridad suklan na sa magkaisog nga illegal drugs operators.