USA ka daug na lang ang kinahanglan sa San Antonio Spurs aron masungkit ang ikalimang kampeyonato sa franchise human nga subling gitambakan ang defending champion Miami Heat sa Game 4, 107-86, kagahapong adlawa.

Sulayan sa Spurs nga humanon ang serye sa Game 5 sa Lunes didto mismo sa ilang homecourt sa San Antonio, Texas.

Sama sa nahitabo sa Game 3, gidominar og balik sa Spurs ang duwa.

Gipangulohan ni Kawhi Leonard ang opensa sa San Antonio sa iyang double-double performance nga dunay 20 puntos ug 14 rebounds.

Mibulso sab og 19 puntos si Tony Parker samtang 14 puntos kang Patty Mills.

Bisan og unang naka-basket ang Heat, mitala og equalizer ang Spurs ug wa na gitugotang makalamang ang Miami gikan sa unang quarter hangtud nahuman ang duwa.

Sa first quarter, miiskor og 13-4 lead ang Spurs human ang back-to-back 3-pointers ni Danny Green.

Sa ikaduhang quarter, mihimo og 13-5 run ang San Antonio lakip ang putback slamdunk ni Leonard.

Sa paghuman sa first half, lamang og 22 puntos ang Spurs samtang na-boo ang mga magduduwa sa Heat samtang pasulod sa ilang locker room.

Sa third quarter, gisulayan sa Heat nga magukod ang lamang sa Spurs ug mikamada og 12-6 run lakip ang 10 puntos ni LeBron James aron makunhod sa 13 ang abanse.

Apan gitubag sab gilayon sa Spurs og 12-1 run ug miabot sa 24 points ang pinakataas nga lamang sa San Antonio hinungdan aron mas mikusog ang boos sa Heat players.

Gidala ni LeBron James ang Heat sa iyang 28 puntos apan way tabang gikan sa mga teammates.

Si Dwyane Wade kay duna lay 10 puntos samtang 12 puntos sab ang nahatag ni Chris Bosh ug si Ray Allen kay nalimitahan sa walo ka puntos.

Kini ang unang higayon nga napildi ang Heat sa sunod-sunod nga playoff games sugod niadtong 2012 Eastern Conference finals.

Sa kasaysayan sa NBA, wala pay tim ang nakabawi gikan sa 3-1 deficit sa finals.