BANSALAN, Davao del Sur - Kapin gatos na ka mga motorsiklo ang gihipus sa kapulisan human gitutukan ang pagsikop sa mga motorsiklo nga naggamit og bora-bora nga tambutso.

Suma ni Police Senior Inspector Jeffrey Latayada, hepe sa Bansalan Police Station, giulan og reklamo sa katawhan ang ilang buhatan tungod sa kahasol sa mga drayber nga nigamit og bora-bora nga tambutso.

"Pwerteng sabaa panahon sa kaadlawon so amo ning tinud-on," pung ni Latayada.

Apan ning kasamtangan gihatagan pa og pabor sa kapulisan ang mga dinakpan sanglit gipatanggal ang bora-bora nga tambutso sud sa istasyon aron ibalik ang orihinal nga tambutso.

Ugaling magmagahi pagtanggal ang usa ka drayber mahimong isyuhan og Temporary Operators Permit (TOP) gikan sa Land Transportation Office (LTO) o kaha citation ticket sa munisipyo.

Gidason ni Latayada nga subay sa Republic Act 4136 kun Transportation and Traffic Code ang ilang gipatuman nga pagpanakop sa mga bora-bora nga motorsiklo.

"This is a national law so taas gyud og multa kay kung citation lang sa munisipyo naa ra sa P300 ang ilang bayaran," niya pa.

Mga natanggal nga bora-bora nga tambutso gipabilin na sab sa buhatan sa kapulisan aron di na gyud ibalik pa sa mga drayber.

"Mas maayo nga sa dili pa sila madakpan ila na lang tanggalon daan," panapos sa opisyal. (Orlando Dinoy)