Armadong grupo napugngan sa MILF

KIDAPAWAN CITY - Malampusong napugngan sa Moro Islamic Liberation Front (MILF) ang subling pagsulong sa mga armadong grupo alas 2:00 sa hapon niadtong Biyernes.

Nasayran gikan sa spot report sa North Cotabato Provincial Police Office nga gisulod na sab sa mga armadong lalaki ang Sitio Nazareth, Barangay Amas, Kidapawan City.

Sa maong lugar nila gipangita ang ulo ni Kenti Diagao Matalam kinsa giputlan og ulo niadtong miaging semana sa wala mailhing mga tawo.

Diriyot unta magkapinusilay dihang nahiabot sab ang armadong grupo sa mga kristiyano nga nakamatikod sa pagsulod sa laing pundok sa ilang dapit.

Milihok dayon ang mga sakop sa Joint Crisis Monitoring Team sa militar, kapulisan, International Monitoring Team (IMT), mga opisyales sa barangay uban ang MILF.

Mismo ang mga representante gikan sa MILF ang nakig-istorya sa mga armadong lalaki gikan sa Barangay West Patadon, Matalam, North Cotabato, nga dili nila idayon ang ilang dautang plano.

Tungod niini, miatras ang mga armado pabalik sa ilang kampo apan nagbahad kini nga kung dili masilutan ang mga tawo nga milunggo sa liog ni Matalam sila ang mangita og hustisya niini.

Kahinumdoman nga niadtong adlaw nga Sabado miatake sab ang naasoy nga pundok diin tulo ka mga sibilyan nga molupyo sa Sitio Nazareth ang napatay ug duha ang naangol sa mga pulis.

Ang Joint Crisis Monitoring Team gimugna ni Kidapawan City Mayor Joseph Evangelista ug North Cotabato Governor Emmylou ”Lala” Taliño-Mendoza nga maoy natahasan nga magbantay sa Sitio Nazareth samtang nagpadayon ang negosasyon sa bikil sa yuta sa mga armadong kristiyano ug tribong Maguindanaon.(Edgar Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph