DAVAO CITY - Gisusi na karon sa kapulisan ang anggulo sa kamatayon sa negusyante nga taga Cebu City kinsa gipusil alas 6:45 sa gabii niadtong Huwebes.

Ang insidente nahitabo sud sa Vital-C building, Sobrecary kanto Lacson Street, Bo. Obrero, siyudad sa Davao.

Ang biktima giila sa kapulisan nga si Richard Lim King, 56, minyo ug lumad nga taga Cebu City.

Si King mao ang tag-iya sa Vital-C ug Crown Regency Hotel nga makita sa Cabaguio Avenue, ning siyudad.

Base sa journal sa Ata. Ana Police Station, giingon nga mianhi ang biktima sa siyudad aron motambong sa gipahigayon nga graduation rites sa mga bag-ong wellness consultants sud sa bag-ong Vital-C building.

Samtang nagpadayon ang programa, usa ka lalaki ang misulod sa function hall dayon gidul-it pagpusil ang biktima tumong sa ulo hinungdan nga namatay.

Sumala ni Police Supt. Royina M. Garma, station chief sa Sta. Ana Police Station, dihang migawas ang mamumuno human sa pagpamusil, gipangtionan og armas ang mga tawo sa sulod sa function hall.

Paggawas sa suspek, dali siyang misakay sa naghulat nga motorsiklo nga walay plaka padung sa Lapu-Lapu Street.

"After the incident, nagawa pa ng suspek nga tionan og pusil yung nandon sa function hall," sulti ni Garma sa pakighinabi sa Superbalita kagahapon.

Dugang sa opisyal nga ilang susihon footage sa closed-circuit television (CCTV) camera sa kaatbang nga tindahan sa Vital-C building sanglit walay namuntar nga CCTV sud sa building diin gipatay ang biktima.

Hinuon, suma ni Garma, ilang paningkamotan nga masulbad ang krimen.(Jeepy P. Compio)