INILANG car racer champion sa Pilipinas gipusil patay sa duha ka lalaking nagmotorsiklo sa interseksiyon sa dakbayan sa Quezon niadtong Huwebes sa tungang-gabii.
Matod sa kapolisan nga si Ferdinand “Enzo” Pastor, 32, nagmaneho sa usa ka Isuzu tow truck nga may plate number nga WSC 331 nga nagkardada og Asian V8 stock car inubanan sa iyang assistant nga si Paolo Salazar kinsa gikan sa Batangas padulong ngadto sa Clark International Speedway sa Pampanga alang sa final leg sa Asian V8 Championship sa dihang ang duha ka suspek nga nagmotorsiklo, miduol kaniya sa may eskina sa Congressional ug Visayas Avenues.
Sigon pa sa mga nakasaksi nga si Pastor gituohang gipusil sa ulo human siya migawas gikan sa tow truck aron paglantaw sa cargo.
Si Pastor nakaangkon og samad pinusilan sa ulo, liog, bukton ug dali siya gidala sa duol nga tambalanan diin siya namatay.
Samtang si Salazar kinsa milingkod sa passenger seat nakaangkon usab og mga samad.
Si Pastor mao ang unang Filipino nga nagantihan sa National Association for Stock Car Auto Racing (Nascar) hall of Fame sa Home of Nascar sa Charlotte, North Carolina ug nakasalmot sa Nascar Whelen Euroseries Open Championship Race Circuit.
Miapil usab siya sa Asian Formula 3 diin siya mikarera sa Macau Grand Prix ug ang iyang kinatapusang karera mao ang Asian V8 Championship nga gipangulohan sa iyahang amahan nga si Tom Pastor. (Genevieve Fernandez; USJ-R MassCom Intern)