MIPAGAWAS og komentaryo si Mia­mi Heat forward Chris Bosh kabahin sa sultisulti nga madugang si Carmelo Anthony sa puwersa sa Heat alang sa sunod season sa National Basketball Association (NBA).

Alang kang Bosh, layo ang posibilidad nga mahitabo kini.

“It’s very, very unlikely,” asoy ni Bosh kagahapon sa wala pa nagsugod ang Game 4 sa NBA 2013-14 finals series tali sa Heat ug San Antonio Spurs.

Sa miaging adlaw, gikataho sa ESPN nga naglaraw ang Heat nga mohimo’g lakang aron magpabiling solido ang ilang Big Three nga sila si LeBron James, Dwyane Wade, ug Chris Bosh unya idugang si Anthony niini.

Sa interbyu sa Miami Herald, nagkanayon si Bosh nga sukad wala sila nag-estorya ni James kabahin niini.

Aron mahitabo ang giingong laraw sa Heat, gikinihanglang mopirma og bag-ong mga kontrata ug mouyon nga kibhangan ang ilang suweldo aron masulod si Anthony, pambato sa New York Knicks.

Si Anthony, kinsa usa sa mga nagdawatan og dakong suweldo sa liga, puwede nang mahimong free agent inig human sa 2013-14 season.

Ang Heat dili puwedeng makatanyag og kontrata ngadto kang Anthony hangtod karong Hulyo 1 kon makadesisyon man gani kini nga mag-free agent.

Si Anthony gitagalan hangtod ka­rong Hunyo 23 aron pahibaw-on ang Knicks kabahin sa iyang intensyon.

Gilauman nga buhaton tanan ni Knicks president Phil Jackson aron mag­pabilin si Anthony sa ilang balwarte.

Mao sab kini ang sitwasyon nila ni James, Wade ug Bosh. Kinahanglan sab nilang pahibaw-on ang Heat sa ilang intensyon.

Si Bosh nagkanayon nga ganahan siyang magpabilin sa Miami apan si James wala pa’y klarong desisyon.

“That’s kind of like on the back burner right now,” batbat ni James. (Reuters/ESL)