NAGKINAHANGLAN na lang og usa ka daog ang San Antonio Spurs ug makuha na nila ang wala nila makuha sa miaging tuig -- ang kampiyunato.

Laing dakong kadaugan ang gi­mugna sa San Antonio Spurs batok sa back-to-back champions Miami Heat, 107-86, kagahapon sa Game 4 aron pagposte og 3-1 nga bintaha sa best-of-seven championship series sa National Basketball Association (NBA) 2013-14 season sa American Airlines Arena sa Miami.

Sa miaging season, dako unta og kahigayunan ang Spurs nga maangkon ang korona apan gipakyas sila sa Heat sa deciding Game 7.

Sa wala pa nagsugod ang finals series ning tuiga, ang beteranong forward sa Spurs nga si Tim Duncan misaad nga langkaton nila ang korona ning higayuna.

“We’re going to do it this time,” matod pa ni Duncan.

Sama sa Game 3, nagdilaab na sab ang opensa sa Spurs gikan pa lang sa pagsugod. Mitali sila og 57.1 percent sa fieldgoal.

Sa pagkakaron, daw magkina­hanglan na ang Heat og milagro aron makabangon gikan sa ilang kasamta­ngang pagkaunlod.

Sukad masukad sa kasaysayan sa NBA, wala pa sa 31 ka teams nga nabiyaan og 1-3 sa championship series ang nakabangon aron angkunon ang korona.

Ang series mobalik sa korte sa Spurs karong Lunes (RP time) alang sa Game 5.

Sa matag quarter sa nag-unang 36 ka mga minutos, gilupig sa Spurs sa pinuntosay ang Heat. Sa pagsugod sa 4th quarter, ang Spurs naglabaw og 81-57.

Ang bayani sa Spurs sa Game 3 nga si Kawhi Leonard kuyaw na sab nakaduwa ug gipangulohan niya ang kadaugan pinaagi sa iyang 20 puntos ug 14 rebounds. Nidugang og 19 puntos si Tony Parker.

Alang kang Spurs coach Gregg Popovich, dako sab og natabang kanila si Boris Diaw sukad nga gilakip kini niya sa starting line-up.

“Boris makes us a smarter team,” asoy ni Popovich. “Boris is a passer, and he understands mismatches. On defense, he knows where to help.” Bisan sa dako nilang bintaha sa series, nagkanayon si Diaw nga dili gihapon sila angayang molugak bisan og gamay.

“It’s great that we get the opportunity to go back home but we know it will not be an easy game. We know they will play for their lives,” pasabot ni Diaw.

Ang Heat gipangulohan ni LeBron James pinaagi sa iyang 28 puntos, nidugang og 12 puntos si Chris Bosh samtang niamot og 10 puntos si Dwyane Wade.

Malaumon gihapon si James nga makabangon sila hinuon giangkon niyang ubos ang ilang moral sa kasamtangan.

“We have put ourselves in a position where we have to make history,” batbat ni James.

“They smashed us in two straight home games. They were much better than us in these two games, but the series is not over.”

Puntos matag usa:

San Antonio (107) - Leonard 20, Parker 19, Mills 14, Duncan 10, Green 9, Diaw 8, Ginobili 7, Splitter 6, Belinelli 4, Ayres 3, Bonner 3, Baynes 2.

Miami (86)- James 28, Bosh 12, Jones 11, Wade 10, Allen 8, Andersen 5, Cole 4, Chalmers 4, Haslem 2, Lewis 2. (Reuters/ESL)