WA SIGURO kaantos sa mga pag-ataki ug pag­saway sa mga media, napugos sa pag-terminate ang Kapitolyo sa serbisyo sa kontrobersiyal nga Black Pearl Security Agency (BPSA) sugod karong adlawa.

Nagkapuliki na man gud intawon ug wa magkadimao sa pagtubag ang Kapitolyo ilabi na ang grupo ni Provincial Legal Officer Orvi Ortega, kinsa mao usab ang chairman sa Provincial Bids and Awards Committee (BAC), sa mga pangutana sa media.

Tiaw mo bay human mapupos ang kontrata sa Tactical Security Agency Inc. (TSAI) niadtong Mayo 31, mi-take over dayon ang Black Pearl sa Kapitolyo nga wala pay kontrata ug labaw sa tanan wala pa usab moagi sa Provincial Board (PB) nga dakong supak sa balaod.

Sa iyang depensa, si Ortega nangatarungan nga mirisgo ra kuno ang maong ahensiya ug temporaryo kining mihatag sa ilang serbisyo.

Sa ato pa ilang gipamasin sa pagdelegar ang kasiguroan sa Kapitolyo.

Pipila pa gani ka adlaw sa ilang serbisyo, nasuta nga dunay mga guwardiya sa Black Pearl nga ni-duty nga walay armas. Ning uwahi lang dunay nasakpan nga natulog samtang nag-duty, dunay aksidenting nakaigo og driver sa habal-habal samtang naglimpyo sa iyang armas, ug usa usab ang gikataho nga walay license to work.

Unya mao ni klasing ahensiya nga ilang gipa­boran nga mobantay sa kabtangan ug seguridad sa Kapitolyo?

Sa nahisgutan sa unahan, kinsa bay di magduda nga dunay nagpahipi nga anomaliya sa maong trans-aksiyon.

Ang Black Pearl di makakolekta og bayad gikan sa Kapitolyo tungod kay mahug man kini nga illegal. Andam ba silang mosuweldo sa ilang mga guwardiya nga nakaserbisyo na?

Kini maoy risgo sa pagkabunggo.