Jicel Reve S. Gabriel
Cebu City
Ning naglagiting nga kainit sa udtong tutok
Higupon ta ang kabugnaw sa sabaw
Alang sa tiyang nagdaguok,
Hukason ta ang sapaw sa nanubrang
Sapot sa lawas aron batok sa bungag-singot
Ang atong panit maluwas.
Buksi, ablihi ang bugnawng botelya
Tugoting suyupon niini ang kaigang
Sa ginhawaang nagbaga.
Apan yuna ra, ana ba gyud ka manutok?
Kabugnaw ba sa imong presensya
Nga init man unta kaayo kining adlawa!
Makapanglad-ok man pod ta
Nga wa damha.
Sa haguyhoy sa hangin ako mipahiyom
Kay nasingo ko ang mipilit nga alimyon,
Apan laing taghoy sa hangin nangyam-id
Daw nanghimaraot sa kainit sa akong kilid.
Init, antuson ko ang kahait sa imong pagpamaak,
Kay sa akong kaugalingon ako man makaagak.
Apan sabta lang pod ko ining diyutay
Kong kapritso.
Di na ko! Di na ko! Di na lagi ko!
Kausa na lang!
Padayuna ang nanuktok sa udtong tutok!