DEAR Noy Kulas,
Sama sa uban nga mga ginikanan nia ko sa abroad nanimpalad ug giagwanta ang kamingaw aron lang matunhay ang akong pamilya. Tagoa lang ko sa ngan nga Smiley, nagtrabaho isip clerk. Naa koy tulo ka mga anak nga nahabilin diha. Naa sila magpuyo sa pamilya sa akong bana nga otro usab nga iresponsable kay igo rang modawat og limpyo.
Ang akong pamilya maglisod sa pagbantay sa akong mga anak kay duna say kaugalingong panginabuhi mao nga toa sila kuyog sa akong bana.
Ang akong bana mipuyo balik sa iyang side kay aron kuno dunay makatabang niya og atiman sa mga bata.
Makausa nanawag ko sa akong anak nga kamaguwangan ug nangumusta kay nagpadad-an ko nila og kuwarta nga akong gipaagi sa akong bana ug iyang pamilya. Nisumbong ang akong anak nga wa silay atiman ug wa sila makatilaw akong gipadala nila. Kaingon nako og estorya lang sa akong eldest kay dihang akong gi-confront ang akong bana, mihimakak siya.
Akong gipasusi sa akong igsuon kon unsa katinuod. Nakit-an intawon sa akong igsuon ang kadaut sa akong mga anak nga lago, nga maorag pinasagdan ug way nag-atiman samtang ang akong bana naa ra sa imnanan nagyampungad.
Gisakitan ko sa giasoy sa akong igsuon kay nagtuo intawon ko nga ang kinayod diri sa abroad na-enjoy sa akong mga anak. Unsa may akong buhaton, Noy Kulas? Dia ko diri sa abroad thinking nga dunay mahayag nga kaugmaon ang akong mga anak unya useless diay kay gipasagdan lang sila. Please tambagi ko kay naglibog na ko unsay akong buhaton.
SMILEY
Smiley,
Mao bitaw na ang tuyo ug tumong sa mga ginikanan, amahan ug inahan, nga mo-abroad.
Bisan sa kamingaw kay halayo sa pamilya, agwantahon lang aron makahatag og kaharuhay o masuportahan ang panginahanglan sa pamilya.
Apan dimalas kay dunay mga kahigayunan nga ang resulta sukwahi sa imong tumong. Mao ni ang nahitabo sa imong mga anak.
Mas maayo nga magpatabang ka sa imong pamilya aron mahiadto sa imong mga anak ang imong ipadala. Kon dunay kabanay nimo nga imong masuholan isip tig-atiman sa imong mga anak, kini ang imong tugyanan sa mga bata. Adto na sa imong igsuon ang kuwarta ipadala.
Sa higayon nga mosupak ang imong bana, gamita ang extreme measure nga mao ang paghunong sa imong pagpadala sa kuwarta ngadto kanila.
Mas maayo nga anha na lang na nimo aron mas matigom ug ma enjoy sa mga bata. Unya kon mopadala ka, adto ipaagi sa imong pamilya.
Pananglitan papalitan nimo og mga senina nga ilang masul-ob, school supplies nga ilang magamit sa tunghaan ug uban pa. Ayaw na pakupti sa imong bana.
Unya paduawa og abogado ang imong pamilya aron magiyahan unsay inyong buhaton. Suwayi ang social welfare sa inyong dapit og konsulta kay nakahibawo usab sila sa balaud sa custody sa mga bata. Ang importante nga mapanalipdan ang imong mga anak gikan sa abuso kay sila ang gigamit sa imong bana ug sa iyang pamilya aron mahimong gatasan.
NOY KULAS
Alang sa imong suliran, e-mail sa kulassuper@sunstar.com.ph