GIPAABOT nga makasinati og problema sa trapiko sa dalan Vicente Rama Avenue, siyudad sa Sugbo tungod sa gikatakda nga pagpatuman sa road concreting.
Gibanabana nga moabot og pito ka buwan ang proyekto.
Si kanhi Konsehal Joey Daluz niingon nga ukangon ang mga aspalto sa maong dalan ug ilisan kini og semento nga may gibag-on nga 11 ka pulgadas.
Ang pagpasemento sa dalan may gitas-on nga usa ka kilometro magsugod sa eskina V. Rama ug B. Rodriguez hangtod sa eskina V. Rama ug dalan Alcantara.
Gibanabana ang proyekto nga mogasto og kapin sa P44 milyunes ubos sa proyekto sa Department of Public Works and Highways (DPWH).
Giduso ngadto sa buhatan sa Cebu City Traffic Operations and Management (Citom) ang work schedules sa maong proyekto aron maminusan ang problema sa trapiko sa maong dapit sa dakbayan.