UBAY-UBAY ang nitambong sa gipahigayon nga Disaster Risk and Management System (DRRM) Summit sa Isla sa Camiguin niadtong Hunyo 10 hangtod sa Hunyo 11 ning tuig.

Gisugdan kini sa pasiunang mensahe ni Governor Jurdin Jesus Romualdo ug gitapos pinaagi sa pagpirma sa giingong kasabutan.

Gimugna sa Isla sa Camiguin ang maong Summit nga gipanguluhan sa Offiice of Civil Defense 10 (OCD-10) nga si Director Ana Cañeda aron mapakita sa katawhan ug namuno sa gobyerno kon unsa ka importante ang maong programa.

Naasayran nga ang Camiguin usa sa mga probinsiya nga duol gayud sa mga kalamidad sama sa pagbaha, tsunami ug pagpanghugno sa mga yuta.

Sa presscon gitubag sa gobernor sa Camiguin ang pangutana sa mga media nga kuno andam ba sila kun ugaling adunay moabot nga susamang mga katalagman susama kaniadto sa Bagyong Sendong ug Yolanda.

"Kung e-rate, we are prepared 8 out of 10 if there are calamities na moabot," giingon ni Romualdo.

Dugang pa niini nga dili angay usab nga mabalaka ang mga katawhan sa Camiguin tungod kay gibuhat nila ang tanan para ma luwas o mapalayo sa kakuyaw kon moabot man ang mga giingong mga kalamidad.

Aduna silay mga programa susama sa pag-abot gayud sa pantalan makita ang usa ka signage nga “Dalan paingon sa lugar nga luwas sa Tsunami”.

Kini nagpakita nga anaa na silay mga nakitang luwas nga lugar kon adunay moabot nga mga bagyo ug usab kon signal number 1 pa lamang ila na usab nga ipalayo ang mga lumulupyo duol sa mga lugar nga bahaanan ug uban pa.

Sa katapusan, gilagdaan sa Gobernador, mga mayor sa kalungsuran sa Camiguin ang maong kasabutan agi og pag-uyon sa maong programa ug ugma damlag pagpatuman niini.