GIDAYEG ni konsehal Ramon Tabor kinsa chairman komite sa police fire and public safety sa konseho sa kalampusan nga gihimo sa City Intelligence and Detection Group-10 (CIDG-10) sa pagkasikop sa gitouhang mga gun-runner ug pagkapatay sa usa ka kauban niini kagahapon sa kadlawon sa Barangay Gusa ning siyudad sa Cagayan de Oro.
Matud ni Tabor nga iyang gidayeg tungod kay nagbunga ang makuti nilang imbestigasyon ug surveillance niining mga suspek nga giinong taod taod na diay nga gapamaligya og ginadili nga armas.
Apan kinahanglan nga imbestigahan kini pag-ayo sa kapolisan labina gyod ang mga identity niining mga suspek kung asa kalawom ang ilang mga koneksyon sa paghupot ug ingon ani nga mga armas.
Kini aron mapugngan ang ilang mga operasyon kung unsa man ilang mga dautan nga motibo denhi sa siyudad. Labina posibleng gigamit kini sa mga aktibidades sama sa pagpanulis o ingon man pagpamaligya.
Kung unsa man ang tumong niini gipasalamatan ni Tabor nga sa labing daling panahon napakgang kung daw ang laraw niini mao ang samukon ang kahapsay ug kalinaw sa siyudad.
Panawagan na lamang ni Tabor sa katawhan nga magkooperar sa kapolisan ug itaho kung unsa man ang mga naobserbahan sa palibot nga dili makaayo alang sa komunidad. (SVB)