WALAY puas ang operasyon sa mga sakop sa Philippine Drug Enforcement Agency-Northern Mindanao (PDEA-10) human sunod-sunod nga buy-bust operation ang ilang gihimo nining semanaha sa nagkalain laing probinsya sa Rehiyon 10.

Niadtong Huwebes mokabat upat ka mga operasyon ang gilusad diin unang operasyon gihimo sa Barangay Gusa nining siyudad nga miresulta sa pagkaaresto sa mga suspetsado nga giilang sila si Jay-are Fajardo, 23, ug Amando Diaz, 42.

Nakuha sa ilang posisyon ang mokabat 50 gramo sa gituohang shabu nga mobalor og P350 mil.

Mga alas 4:30 sa hapon adlaw gihapon sa Huwebes nasikop si Ali Macaangcos taga Barangay Barra, lungsod sa Opol, Misamis Oriental diin nakuha sa iyang posisyon ang mokabat 26 ka gramo sa gitouhang shabu nga mobalor og P182 mil.

Ikatulo nga operasyon gihimo sa usa ka parking area sa usa ka mall ning siyudad nga miresulta sa pagkaaresto ni Ben Bonsalagan, 28, lumad nga taga Marawi City, Lanao del Sur, nga nakuha sa iyang posisyon ang mokabat 100 gramo sa gitouhang shabu mobalor og P800 mil.

Giangkon sa suspetsado nga iyang gihatod ang maong illegal nga druga sa usa ka soud nga higala nga residente denhi sa siyudad apan nidumili kini sa paghatag og pangalan.

Si Rayford Yap kinsa Assistant Regional Director sa PDEA-10 niingon nga taod taod na usab kini nilang gisurveillance tungod kay kanunay makadawat og report nga denhi sa siyudad gakitaan ang duha.

Matud niini nga dili lamang denhi matapos ang ilang operasyon sa pagsulbad nga luwas ang rehiyon sa ginadili nga druga tungod kay daghan pa ang gikatakda nga operasyon nga gilauman niining magmalampuson.

Samtang laing operasyon gilusad sa siyudad sa Gingoog diin nakuha mobalor P1 milyon nga gitouhang shabu diin padayon pa nga giila ang suspetsado.

Ang mga nadakpan nga suspetsado ang gikatakdang mag-atubang og kasong supak sa RA 9165 kon Comprehensive Dangerous Drugs Act. (SVB)