PATAY ang usa ka gituohang gun runner human nakigpinusilay sa grupo sa City Intelligence and Detection Group-10 (CIDG-10) kagahapon sa kadlawon sa Capistrano Complex, Barangay Gusa ning siyudad sa Cagayan de Oro.

Giila ang namatay nga mao si Jelan Maquiso Alim, taga Balongis, Barangay Balulang ning siyudad kinsa giingong driver sa magsuong Dominic ug Dennis Betangcurin nga giingong taod-taod na nga gapamaligya og illegal nga mga armas.

Milusad og operasyon ang grupo sa CIDG diin usa kanila nagpatuong buyer apan daw dihang namatikdan nga presensya diay kini sa CIDG misuway og sibat ang mga suspek sakay sa ilang sports utility vehicle.

Nakigpinusilay pa ang mga suspetsado sa kapolisan apan naigo sa iyang dughan hinungdan sa kamatayon sa driver niini nga si Alim kinsa nakuhaan og kalibre 45 nga armas nga aduna pay silencer.

Sulod sa sakyanan giingong nasikop sila si Betangcurin ug nakuha usab sa ilang posisyon ang machine gun.

Ang mga suspetsado kinsa anaa na karon gibalhog sa prisuhan sa CIDG ang giingong dili gyod mosulti sa ilang mga kalambigitan kalabot sa illegal nga mga armas hinungdan mihimo pa usab sila og masusing imbestigasyon kalabot niini.