BALAY sa mayor gilungkab ug nakuhaan sa mahalong mga butang ug cash kagahapon sa alas 12:30 sa kadlawon sa Barangay Owak, Asturias, Sugbo.

Si Asturias Mayor Allan Adlawan nabiktima sa iyang scholar nga giilang si Jupiter Baliguat, 18, ulitawo, 3rd year college sa kursong civil engineering ug dean’s lister sa usa ka tunghaan sa Tuburan.

Nabalik hinuon ang P24,000 cash ug lap top nga P25,000 dihang giuli sa amahan human nadakpan sa kapulisan ang suspek sa akto sulod sa balay sa mayor.

Si SPO3 Dennis Nucos, deputy police chief sa Asturias Police nga nahinabi sa dySS Super Radyo ug Sun.Star Superbalita, niingon nga si Baliguat nadakpan sa akto sa ilang kauban nga si PO1 Redford Tabriga, close-in security ni Adlawan.

Matod niya nga nakasaka sa balay sa mayor si Baliguat agi sa terrace.

Dihang nakasulod, nidiretso siya sa opisina ug giguba ang drawer diin didto ang cash ug laptop.

Apan nakabantay si Tabriga nga dunay naglakawlakaw sulod sa balay mao nga iyang gisusi ug naaktuhan si Baliguat hinungdan nga gidakop.

Sa gipahigayong inventory, nawala na ang kwarta i­ngon man laptop, apan alas 7 kagahapon sa buntag, ang amahan niini nga si Gorgonio niuli sa cash ug laptop.

Nahibaw-an nila nga dugay na nga scholar sa mayor si Baliguat.

Daghan silang mga susama kaniya nga gipatungha ingon man gipapuyo sa balay.

Apan si Adlawan nipapahawa kang Baliguat sukad niadtong Abril human sa klase ug wa na pabalika kay gituohang maoy responsabli sa pagkahanaw sa mga kwarta ug uban pa.

“Wala na papuy-a sa mayor kay mao lagi daw ni siyay responsabli sa mga kawat. Daghang nawala sa panimalay sa mayor dihang nagpuyo pa ni siya,” dugang ni Nucos.

Gipadayag niya nga wa sa kaugalingon si Baliguat dihang nadakpan ug gituohan nga naggamitan sa illegal nga drugas. (GPL)