PERSONAL nga gipang-apud-apod ni Mayor Johnny V. de los Reyes (JVR) sa dakbayan sa Talisay ang school supplies sa mga tinun-an sa elementarya nunot sa pagsugod na sa klase.

Gikan sa mga tinun-an sa nursery hangtod sa K-12 ang gipanghatagan sa school supplies atol sa pagsaulog sa ika-116 nga anibersaryo sa Independence Day niadtong Hunyo 12, sa mismo sa buhatan sa mayor.

Ang mga bata gikuyogan sa ilang mga ginikanan sa pagdawat sa school supplies, mipadayag sa ilang kalipay.

Matod sa mga ginikanan nga ning kalisod karon sa panahon diin lisod ang pagpatungha sa mga bata maayo na lang nga maminusan ang ilang sa pagpamalit og school supplies.

Ang supplies gisulod sa plastic envelope nga gilangkuban sa mga notebook, ballpen, lapis, intermediate pad, folder, ug mga bond paper.

Mokabat sa 565 ka mga bata ang nakadawat sa mga gipanghatag nga school supplies ug dunay laing 70 ka mga street children ang gitakda usab nga panghatagan.

Si JVR nagkanayon nga sa buwan sa Hunyo, personal unya siyang moduaw sa mga tulunghaan aron pagsusi sa kahimtang sa mga tinun-an. (DRT)