Gipahimangnuan sa Committee on Budget and Appropriations sa Hunta Probinsiyal ang mga opisyal sa mga lokal nga kagamhanan (LGU) lukop lalawigan pagsunod sa proseso, ilabi na sa mga pagpamalit og supplies ingun man sa pagkuha og serbisyo sa mga pribadong kompaniya.
Kini human nakita sa Sandiganbayan nga sad-an si Aloguinsan Mayor Cynthia Moreno sa kasong graft nunot sa pagpatuman niinig proyekto nga walay bidding.
Ang Chairman sa Committe on Budget and Appropriations nga si Bokal Gigi Sanchez, kinsa mao say nagrepresentar sa 3rd district, diin sakop ang Aloguinsan, miingon nga dili gyud angayang mopagawas og gahin ang lokal nga kagamhanan kon wala pay bidding nga nahitabo sanglit mao man kini ang proseso nga kinahanglang sundon.
Nagtuo si Sanchez nga nahatagan og hustisya ang mga taga-Aloguinsan human nga nakombikto ang ilang mayor sa pagpangawkaw o pagpabor sa usa ka kompaniya nga maoy mohimo sa proyekto.
Gihimug-atan sa opisyal nga kinahanglan tarungon sa LGUs ang paagi sa ilang procurement ug purchase sa ilang mga gikinahanglan aron dili mausik ang kwarta sa gobiyerno ug dili sab kini mag-atubang og kaso.
Si Mayor Moreno mo-apelar hinuon sa iyang pagka-kombikto ug matod niya, walay iregularidad nga nahitabo sa mga proyekto nga iyang gipatuman. (AZDL)