GIHANGYO sa Bureau of Fisheries and Aquatic Resources (BFAR) 7 ang publiko nga motuman sa balaod nga naghatag og proteksiyon sa mga endangered species sama sa iho, ilabi na sa thresher sharks.
Sigon sa BFAR hugot nga gidili ang pagpanagat ug pagpalusot sa maong matang sa sea creature.
Gihimo sa ahensiya ang maong hangyo human nasakmit sa Provincial Anti Illegal Fishing Task Force ang karne sa thresher sharks nga dalhon unta sa dakbayan sa Lapu-Lapu ug himuong fishball ug tempura.
Sigon ni BFAR 7 Assistant Regional Director Allan Poquita nga duna silay mga team nga nag-monitor sa pagpanagat ug shipment sa endangered species.
Mapasalamaton siya sa Kapitolyo nga nihimo og aktibong lakang pagpakgang sa illegal nga kalihukan.
Lakip sa mga klase sa iho nga gidili nga kuhaon gikan sa dagat mao ang mga whale shark, great whale shark, ug ang mga thresher shark. Gilatid kini sa Provincial Fisheries Code ug sa nasodnong balaod.
Sigon sa BFAR, importante nga magpabilin sa kadagatan ang mga matang sa mananap kay makahatag kini og balanse sa ecosystem. (AZDL)