DAKONG sapa sa barangay San Roque, dakbayan sa Talisay gitambakan og anupog kay giingong tukoran og hotel.
Apan kini gisupak sa mga lumolupyo nga naapektuhan sa mao nga proyekto.
Konseho mosusi kon gitugtan na ba kini sa buhatan ni Mayor Johnny V. delos Reyes bisan kon wa moagi kanila.
Hinuon, si Talisay City Administrator John Yre de los Reyes niingon nga iyang susihon kon gitugot ba ang pagtukod og edipisyo sa dapit base sa zoning sa Siyudad.
Ang mga lumolupyo sa barangay San Roque nga naglangkob sa tulo ka mga sityo nga mao ang San Rafael, Salvedo, ug Sawsaway ningdangop sa Sun.Star Superbalita human giabunohan ang sapa sa ilang lugar nga nagdugtong sa dagat sa South Reclamation Project.
Ang tubig gikan usab sa ubang mga barangay sa Talisay nga mipaingon sa maong sapa una pa motipon sa dagat sa may SRP.
Apan nakalitan ang mga lumolupyo kay gisugdan nag abuno og anupog ang dapit.
Ilang nasayran nga binlan na lang og 8.5 meters nga gilapdon ang agianan sa tubig aron makapadayon og agas paingon sa dagat.
Niadtong miaging adlaw, nisusi sa lugar ang tulo ka mga konsehal sa siyudad pinangulohan ni Konsehal Antonio Bacaltos Jr., chairman sa committee on environment and natural resources ug sila si Konsehal Aldin Diaz ug Konsehal Dory Emit.
Si Alma Sanchez, presidente sa San Rafael Urban Poor Association, niingon nga base sa ilang pakisusi sa ilang kapitan nga si Sibing Abraham, ang gihatag sa barangay mao lang ang permit alang sa pag-riprap ug retaining wall.
Apan natingala sila nga giabunohan na ang sapa hinungdan nga nisaka ang tubig ug miabot na sa sawog sa mga balay.
Si Bacaltos niingon nga iyang susihon kon nganong natitulohan ang maong lugar ug nabaligya ngadto sa usa abogado nga usa man kini ka sapa.
Gusto usab nga susihon nila Emit ug Diaz kon nakakuha ba og Environmental Compliance Certificate (ECC) sa Department of Environment and Natural Resources (DENR) ang developer.
Gusto usab nilang sutaon sa buhatan sa zoning kon unsay classification sa dapit kon mahimo bang matukoran og hotel.
Matod sa duha ka mga konsehal nga wala silay supak sa paglambo sa siyudad apan unahon pagtan-aw ang kahimtang sa mga nagpuyo.
Si John Yre, kinsa gitudlo usab sa mayor nga zoning officer gawas sa iyang pagka-chairman sa Bids and Awards Committee (BAC), nga nahinabi sa Sun.Star Superbalita, niingon nga sigun sa iyang nasayran adunay gikuha nga permit ang nag-develop sa luna apan iyang susihon kon unsay status niini.
Gibutyag ni Yre nga sigun sa iyang nasayran titulado ang maong luna.
“Sa akong giingon ug akong klarohon nga ako pa nang suhison,” matod ni Yre sa iyang text message sa Sun.Star Superbalita. (DRT)