ADUNA na gitutokan ang Richard King Task Force nga mga tawo nga posible adunay kalabotan sa pagpatay sa magpapatigayon sa nagpadayon nga im­bestigasyon sa krimen.

“Mayroon kaming tinutotokan na mga tawo na probably may kinalaman or may involvement sa pagpatay ng biktima,” pagkompirmar ni Supt. Royina Garma, hepe sa Sta. Ana Police Station ug nagsilbi nga tigpamaba sa task force.

Ang lawas sa negosyante ang nahiabot sa dakbayan sa Sugbo gikan sa siyudad sa Davao sayo sa buntag kagahapon ug pagka alas 11:00 sa buntag gidala ang haya niini sa St. Peter Homes sa dan Imus, ning dakbayan.

Tanang mga anggulo ang gitan-aw samtang nag-establisar sa motibo sa pagpatay sa biktima nga si Richard King, kinsa gipusil-patay niadtong Huwebes sa gabii sulod sa building nga gipanag-iya niini nga nahimotang sa Davao City.

Aduna nay cartographic sketch sa mamumuno ang kapolisan apan dili una nila ipagawas sa publiko hangtod maseguro nga kini ang naghimo sa krimen samtang nagpadayon ang ilang follow-up operation.

“We have to make it sure pag-ipinalabas ito (cartographic sketch) mao gyud to, sure na sure nga siya gyud,” nagkanayon si Garma dihang nahinabi sa Sun.Star Superbalita kagahapon.

Karong Hunyo 18, ang tentative nga skedyol sa lubong sa biktima sa CemPark sa Barangay Banilad, ning siyudad.

Si Davao City Mayor Rodrigo Duterte nimando sa mga awtoridad nga sulbaron ang krimen sanglit aduna kini impact sa kahapsay ug kalinaw sa siyudad labi na usa ka negosyante si King.

Si Garma niingon nga nihangop sila sa P500,000 nga reward gikan sa mayor ug sa pamilya sa biktima sanglit dako kini og ikatabang sa ilang imbestigasyon kon adunay impormante makahatag og balido nga impormasyon pag-ila sa mamumuno.

Sa maong kantidad, P300,000 ang gikan ni Duterte samtang P200,000 gikan sa mga King.

Nalipay usab sila, matod ni Garma, nga nagpatabang ang manghod sa biktima nga si Rafael sa National Bureau of Investigation (NBI) 7 nga mohimo og lawom nga imbestigasyon sa kamatayon sa iyang maguwang.

“Yes, maganda po iyon dahil ang NBI ay part din sila ng task force. We divided the job para mapadali ang investigation at mahuli ang salarin,” dason sa maong opisyal sa kapolisan.

Ang Criminal Investigation and Detection Group (CIDG) Davao nihangyo sa mga counterpart dinhi sa Sugbo nga mohimo og profiling sa biktima sa mga negosyo niini, mga gipangbuhat samtang buhi pa ug posibleng mga nakaaway niini sa una ug karon, dugang ni Garma.

Natan-aw na usab nila ang mga closed circuit television (CCTV) camera labi na ang gipanag-iya sa Davao City Government ug ang CCTV sa kaatbang nga tindahan sa Vital-C diin nahitabo ang krimen, apan wa sila’y nakita nga footage sa hulagway sa gunman ug kauban niini.

Ang mamumuno giingong mition sa mga tawo nga anaa sud sa function hall diin gipatay si King human mitambong og kalihokan sa kompaniya nga iyang gipanag-iya.

Yano kini nga migawas sa building ug sakay sa nagpaabot nga motorsiklo kauban sa laing suspek ug paingon sa Lapu-Lapu Street sa Davao City. (SCG)