RIDING-in-tandem crimes ang sagad nga nahitabo karong panahona gamit ang mga motorseklo nga daling mahulbot sa mga kriminal kon suholan na sa mga impluwensiyadong tawo kon dunay ipalikidar. Apil na dinhi ang mga politiko kon may ipapatay nga kaaway sa politika.
Sa Metro Manila, ang statistic nga natala niadtong tuig 2013, kapin sa 3,000 ang gipamatay sa motorcycle riding in tandem. Dili lang sa Manila kini nahitabo, apan dinhi sa atong siyudad sa Davao, diin pila na tawo ang gipamatay ginamit ang motorsiklo nga walay plate number, nga wala masulbad sa mga otoridad.
Pero wala nakasentro ang atong pagpakabana sa kriminal nga gisuholan gamit ang motorsiklo, kundi ang ilang helmet nga maoy nagsalimbong nga dili sila mailhan atol sa paghimo nila sa krimen.
Niadtong tuig 2009 giaprobahan sa senado ang Republic Act 10054 nga mas labaw nga nailhan sa Motorcycle Helmet Act of 2009.
Ang proponent niini mao si Senador Ramon “Bong” Revilla Jr.
Ang bugtong katuyoan niini mao ang pagpanalipod sa mga motorcycle rider nga kon madisgrasya man, dili mamatay kon mabunal ang ilang ulo.
Ang resulta sa balaod mikunhod ang mga nangamatay sa mga nag-motor nga nadisgrasya basta adunay helmet.
Mao kini ang kaayuhan nga gihatag sa R.A. 10054. Apan unsa kining House Bill 4438? Kini ang ang balaodnon karon nga gipasaka sa Kongresso ni Congressman Celso Lobregat sa Zamboanga City nga, matud pa niya, suspendehon ang helmet law sud sa usa ka tuig ug pasagdan ang local government units (LGUs) pinaagi sa ilang resolution nga maoy magdeterminar kon lugwayan pa ba og laing usa ka tuig kon dili pa masumpo ang krimen nga hinimoan sa riding in tandem.
Bisan pa kon walay House Bill 4438 nga magsuspenso sa R.A. 10054 gihimo na kini sa ubang dapit sa atong nasud. Niadtong tuig 2011, nakabaksyon ako sa lugar sa akong misis sa Calbayog City, Western Samar. Baliktad ang ila didto kon atong ikompara sa atong siyudad sa Davao.
Dinhi sa ato dakpon ka kon walay helmet, pero didto sa Samar dakpon ka kon naka-helmet. Ngano? Tungod kay dili nila mailhan ang kriminal nga sakay sa motorsiklo nga naka-helmet kay bisag asa karong panahona uso na ang motorcycle riding in tandem crimes.
Karon nia kita sa higpit nga pangutana, unsa kadaghan ang nangamatay sa disgrasya kon wad-on ang helmet sa mga motorista, kon itandi sa mangamatay nga hinimoan sa riding in tandem?
Kon mas daghan ang mga motorista, tingali mas maayong palapdan pa sa atong mga otoridad ang paggukod sa mga kriminal, ug di isakripisyo ang siguridad sa mga motorista. Dali raman na! Kon dili lang mo tapulan, sagad sa mga kriminal nga naka-motor walay plate number, di ba? Kadto maoy dakpa ninyo.
Atong hangyoon si Congressman Celso Lobregat nga ibalibag ang iyang House Bill 4438 nga buot suspensohon ang R.A. 10054.
Alang sa dugang komento, pag-email sa algenoguin@yahoo.com, o superbalitadavao@yahoo.com.