ISIP pagtuman sa corporate social responsibility (CSR), gawas sa pagpanghatag og school supplies sa mga estudyante sa San Miguel Elementary School sa North Cotabato, nanghatag sab ang Sun.Star Publishing, Inc. og construction materials sa laing tunghaan dinhi sa siyudad sa Davao.
Ang San Miguel Elementary School nahimutang sa Barangay San Miguel,
Arakan Valley.
Palarang nakadawat sa mga culverts, sand and gravel, PVC pipes ug semento mao ang Manuel L. Quezon Elementary School nga nahimutang sa Barangay 28-C Poblacion.
Human nanghatag ang Sun.Star og school supplies sa 122 ka mga estudyante sa San Miguel Elementary School, milibot ang mga opisyales sa mantalaan sa eskwelahan sa downtown area aron subayon kon unsay ilang gikinahanglan.
Sanglit nasuta nga makaluluoy ang mga estudyante sa Quezon ES panahon sa ting-ulan kay molunop ang ilang eskwelahan, nakahukom ang kompanya nga ipaayo ang ilang drainage system.
Midawat sa mga construction materials mao sila Darwin Polido, school property custodian, ug Leny San Gaspar, school principal niadtong Lunes, Hunyo 9.
Ang turn-over ceremony gipangulohan ni Sun.Star general manager Tessie Paña, Human Resource Head Vic Purgatorio, Newsroom Supervisor Donna Cuyos, Circulation Supervisor John Kapau-an, ug kining tigsuwat.
"Malaking tulong itong dala ninyong construction materials dahil tiyak na hindi na kami makakaranas ng baha tuwing umuulan," pahayag ni San Gaspar.
"So, happy talaga kaming lahat," dugang niya.
Gihimo kini sa kompanya isip kabahin sa ika-15 nga anibersaryo sa Sun.Star Superbalita.