DUHA na ka grupo ang nagpahibalo sa Sun.Star Superbalita nga andam na silang mo-sumiter sa ilang entries alang sa Superbalita Jingle Competition.

Ang duha ka grupo naghangyo nga di lang una panganlan sa balita tungod kay ila pang gipinalisa ang ilang komposisyon.

Labot niini, ang tagdumala sa Superbalita nag-awhag sa ubang grupo nga mosalmot sa maong kompetisyon subay sa ika-15 ka tuig nga kasumaran sa mantalaan.

Sa mga interesado nga moapil, ang jingle nga himuon, gikinahanglang 2-3 minutos.

Orihinal kini, gamit ang Binisaya nga pinulungan, ug nagsubay sa tema nga "Hugyaw Ta! Superbalita Davao 15-anyos na!"

Make sure danceable kini aron sab hugyaw kaayo ug makasayaw ang kinsa mang makadungog.

Bukas ang kompetisyon sa grupo o indibidwal nga nag-edad 18-anyos pataas.

Ang inyong entry, i-submit pinaagi sa DVD uban ang print-out sa lyrics nga nakabutang sa short bond paper.

Isulod ang entry sa brown envelope, uban ang inyong entry, titulo niini, inyong ngalan, address ug contact number.

Uwahing adlaw sa pagsumiter sa entries karong Hunyo 27, 2014, samtang ang pag-anunsiyo sa top three entries himuon sa Hulyo 7, 2014.

Sa jingle nga swak sa panlasa sa atong hurado, ang first prize mobitbit og P5,000 samtang P3,000 sa second prize ug P2,000 sa third prize.

Ipakita na ang inyong talento, apil na ug be part sa labing una nga Jingle Competition sa Superbalita!

Alang sa dugang pangutana, mahimong mo-text sa cellphone number 092-938-0359. Alger Dura