GIBUTYAG ni Davao City Mayor Rodrigo R. Duterte nga dunay lahi nga trabaho sud sa siyudad ang negusyanteng si Richard Lim King, kinsa gipusil patay sa wa pa mailhing suspek sud sa Vital-C building sa Bo. Obrero ning siyudad, Huwebes sa gabii.
Niadtong Biyernes sa gabii sa Royal Mandaya Hotel nakigtagbo si Duterte ngadto sa asawa ug pamilya ni King.
Gisulti nila nga lahi ang trabaho ni King sud sa dakbayan.
Sa pakig-istorya walay bisan usa nga sakop sa media ang nakasulod sa lawak bugtong makita lamang sila pinaagi sa salamin.
"Naay mga butang nga napugos ko'g istorya sa ila, naay mga butang nga wa nila mahibaw-i sa asawa. Akong giingnan nga ayaw kasuko nako, but you have to know, kay mao ni among ginasundan aron makasabot ka," sulti ni Duterte atol sa programang 'Gikan sa Masa, Para sa Masa, kagahapong adlawa, Dominggo.
Giingon sab sa mayor nga dunay mga butang nga di mamahimong masayran diin bugtong asawa lamang ug siya ang nasayod niini sa kinabuhi sa dakbayan.
"Dunay mga butang nga di masulti, pero akong gipasa sa iyang asawa. Ingon nako nga mao ni imong bana, basin wa ka mahibawo, mao ni iyang kinabuhi diri sa Davao sa among nahibaw-an," ingon sa mayor.
Nagsulti si Duterte nga di makadaut sa imahe sa siyudad ang sunod-sunod nga pagpamatay sa mga dagkong negusyante.
"Di pod, uy, kay kana lang duha kabuok di pod makadaut kay mao ra man pod na kay wa man tay kidnapping. Ug kadtong usa, crime of passion man to," panapos sa mayor. (Jeepy P. Compio)