TULO ka nagkalain-laing pagpanunggab ang nahitabo niadtong Domingo sa managlahing dapit ang natala sa balay tambalanan ning siyudad sa Cagayan de Oro.
Nadala sa balay tambalanan ning siyudad si Renante Lapenid, 28, nga taga Aclayan, Malaybalay City, Bukidnon.
Gisaysay sa biktima nga igo lamang sila nga naglingaw-lingaw uban sa iyang kapuyo sa usa ka videokhan sa Camaman-an ning siyudad dihang niduol ang usa ka lalaki ug gikulata ang biktima ug giluba pa.
Ang panghitabo gisunod sa mga kapolisan sa nasangpit nga lugar ug kasamtangang nagpaalim ang biktima sa Northern Mindanao Medical Center (NMMC) ning siyudad.
Samtang laing biktima usab ang nadala sa NMMC human dunggaba sa usa ka wala mailang suspetsado sa Cogon Market mga alas 11:57 sa gabii.
Gisaysay ni Joseph Padilla, 32, minyo nga taga Lapasan ning siyudad nga samtang naglakaw siya sa nasangpit nga dapit kalit lamang siya nga giluba sa wala maila nga suspetsado.
Nakaangkon kini og samad sa wala nga bahin sa abaga hinungdan nga nadala kini sa balay tambalanan.
Nilanding usab sa balay tambalanan si Eric Abalde, 24, ulitawo nga taga Initao, Misamis Oriental human kini gidunggab sa giingong karibal niini sa 3A, Gusa ning siyudad mga alas 11:30 sa gabii
Samad sa walang bahin sa kamot ang naangkon sa biktima.
Kasamtangang gisunod na sa kapolisan ang maong panghitabo alang sa dugang nga imbestigasyon.