USA ka dyip pasaheroan ang gitulis sa nag-inusara nga tulisan niadtong niaging adlaw mga alas 3:00 sa hapon ning siyudad sa Cagayan de Oro.

Midangop sa Police Station 1 (PS1) si Mayett You, 30, dalaga ug residente sa Barangay Gusa ning siyudad human nabiktima sa maong pagpanulis.

Gisaysay sa biktima nga samtang nagsakay siya sa RC-Gusa Liner kauban sa uban nga pasahero kalit nideklarar og tulis ang usa ka lalaki nga nagpatuo usab og pasahero pag-abot sa dyip sa dalan Corrales J.R. Borja ning siyudad.

Nakuha gikan kang You ang P10 mil kapin kon kulang, 3 ka ATM Cards (BDO, BPI ug China Trust), mga Identification Cards ug usa ka metallic Samsung galaxy y nga cellphone.

Samtang laing pagpanulis ang nahitabo sulod sa Patag Liner kinsa gituohang susama lamang nga responsabli ang nihimo sa unang nahitabo nga tulis.

Ang suspetsado nagsuot og pink nga t-shirt, nakapantalon, nakatsinelas ug nakakalo.

Nagdala usab kini sa mahait nga hinagiban aron maoy himuong panghadlok sa mga pasahero.

Padayong gisunod sa kapolisan ang maong sunod-sunod nga pagpanulis ning siyudad alang sa dugang pa nga imbestigasyon.