PATAY ang usa ka eskapo human nakigpinusilay sa kapulisan kagahapon mga alas 11:30 sa buntag sa Hillside, Barangay Lapasan ning siyudad Cagayan de Oro.
Ang biktima naila nga mao si Junie Pantilla, 35, kinsa giingong dunay kasong pagpatay niadtong tuig 2011.
Gisaysay ni Police Officer 1 (PO1) Virgilio Dagcuta, Police Station 3 (PS3) sa Agora sa SunStar Superbalita nga usa ka tawag ang ilang nadawat kinsa nagpahibalo sa presensya ni Pantilla sa maong dapit.
Tungod niini, gipahigayon sa kapolisan asa PS3 ang operasyon uban sa mga membro sa Misamis Oriental Provincial Jail (MOPJ).
Pag-abot sa dapit giingong una nga namusil si Pantilla hinungdan nga nahitabo ang pinusilay ug pagkaigo niini sa nagkalainlaing parte sa lawas hinungdan sa iyang kamatayon.
Nasayran gikan sa crime scene nga dunay ubay-ubay ka mga kaso nga nalambigitan kining biktima.
Usa usab ka sakop sa MOPJ ang giingong naigo sa pagpamusil ni Pantilla.
Samtang gihimo ang imbestigasyon, usa ka babaye ang niabot sa maong dapit ug positibo nga niila sa biktima nga ilang napasakaan og kasong pagpanglugos.
Nakuha gikan sa suspetsado ang usa ka armas nga kalibre .38, 3 ka basiyo sa bala, kwarta ug cellphone.
Kasamtangang gidala na sa Bollozos Funeral Parlor ang patayng lawas sa maong suspetsado alang sa medico-legal nga pagahimuon para sa dugang nga imbestigasyon.