Lalaki gidabdaban, patay

USA ka lalaki ang napalgang nag-aso pa ang patayng' lawas human gidabdaban sa wala mailang suspetsado ug napalgan kagahapon mga alas 7:00 sa buntag sa Barangay Natumolan, lungsod sa Tagoloan, Misamis Oriental.

Walay identipikasyon ang biktima ug dili mahitsura tungod kay sunog kaayo ang lawas niini ug gani hapit na kini maabo. Nagbulag na usab ang uban parte sa lawas niini tungod kay naluto og ayo.

Si Dr. West Edquila kinsa maoy nangulo sa Scene of Crimes Operatives (SOCO-10) ug misusi sa patayng lawas miingon nga posibleng kadlawon pa kini gidabdaban tungod kay nag-aso pa ang crime scene.

Wala silay nakita nga pinusilan basi sa ilang pagsusi sa gawas nga bahin sa lawas niini apan iyang giingon nga usa kini ka lalaki. Buot niining ipaubos sa otopsiya ang patayng lawas sa biktima aron masuta kung gipatay una kini usa gidabdaban.

Si Police Senior Inspector Maricris Mulat kinsa hepe sa Tagoloan Police Station ug kinsa miresponde sa patayng lawas miingon nga sa ilang pag-imbestigar sa dapit daw adunay nakita nga usa ka jeepy nga sakay ang mga armadong lalaki hinuon ang nakasaksi wala nakamatikod nga adunay gisunog.

Gani nanimaho pa ang crime scene og gas ug nag-sige pa og aso ang sawdust nga maoy gibutang sa kilid nga bahin usa kini gidabdaban.

Adunay nagtuo nga binuhatan na usab kini sa grupong vigilantes apan dili kumbinsido ang kapolisan niini.

Kahinumduman nga niagi lamang semana adunay gihapon gisunog nga usa ka lalaki diha sa Indahag ning siyudad sa Cagayan de Oro.

Ang patay’ng lawas anaa sa Bollozos funeral makita alang niadtong pamilya nga nawad-an og sakop.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph