Duwa karon:

(Araneta Coliseum)

8:00 p.m. - Rain or Shine vs. San Mig Coffee

WA kaagwanta ang Barangay Ginebra sa pag-ataki sa Talk ‘N Text Tropang Texters sa naghinapos nga bahin sa fourth quarter hinungdan nga nasugamak na usab kini sa laing kapildihan, 96-92, nga maoy naghikling kanila sa twice-to-beat advantage sa PBA Governor’s Cup playoffs sa Araneta Coliseum.

Ang import sa Texters nga si Paul Harris maoy nahimong mahait nga hinagiban sa Texters aron palig-onon ang ilang paghupot sa playoffs berth nga ila nang nakuha sa niaging semana pinaagi sa pagbuntog sa San Mig.

Ang kapildihan maoy naghatag og seryusong sangputan alang sa Ginebra kinsa nawad-an na sa paglaom nga makahupot sa no. 3 spot sa knockout round ug ingon man sa twice-to-beat advantage batok sa Alaska o sa Air21.

Niini mahimong mapatighug kini sa ikalima o ikaunom nga puwesto, depende sa resulta sa duwa tali sa Rain or Shine ug San Mig karong gabii.

Si Harris mitapos sa duwa nga may 31 puntos, 16 ka rebounds alang sa Texters kinsa sa ilang pito ka daug sa siyam ka duwa, mao na karon ang naghupot sa solong liderato ug ikasangka niini sa quarterfinal round ang no. 8 nga Barako Bull. Naglabaw na gyud unta og 14 puntos ang Ginebra, 67-43, apan ang sharp shooting nga import misugod sa iyang pagpangini sa bisan asa nga anggulo aron labnihon ang labaw sa katapusang singko minutos sa duwa.

Sa sayo pa, nakaeskapo ang Alaska Aces sa kabangis sa Barako Bull, 90-87. Si Jayvee Casio mipaulbo og otso puntos lakip na ang duha ka sunodsunod nga three-point shots sa 2:06 segundos ang pagrehistro sa ilang ikalima nga kadaugan sa siyam ka duwa nga maoy nakatabla niini sa San Miguel Beer, Ginebra ug Air 21 Express sa ikalima ngadto sa ikawalo nga luna.

Ang Globalport nga may 1-8 nga baraha ug ang Meralco Bolts nga mitali og 3-6 nga record maoy unang nangataktak.