DEAR Papa Joe,

AKO si Ermalyn, taga Mindanao apan naa karon sa Cebu. 21 anyos nako ug ang tumong nako ngano niari ko sa Cebu mao ang pagpangita og trabaho kay naa man sad ang uban nakong mga igsuon.

Wala ko magdahom nga ari nako makaplagi ang akong kapikas. Maora kalit ra kaayo ang panghitabo ug nauyab nako siya ug sa wala damha namabdos ko. Abi man nako nga maayo siya nga pagkabana pero sa tinuod lang buotan man siya pero duda ko ani niya kay maora gyud ni siya nagbinuang nako kay sige lang siya og overtime. Hangtod nga nanganak na lang ko, nisamot ang akong pagkase­losa kay tinuod naa siyay panahon namo, pero ang iyang pagpangga sa uyab pa mi, nawala ug sa bata nalang gani napadulong mao na nisamot ang akong pagka insecure hangtud nga mayawyawan nako siya ug mahayan.

Di man sad siya makigbuwag nako. Siguro sa bata pero paminaw nako nagbinuang na ni siya kay daghan naman kayo siya og textmate nga babaye ug kon akong pangutan-on, amiga ra daw . Unya dugay pa kaayo siya mouli, dili lang kay usahay, kon di permi nga wa man sad koy nakita na niasenso mi kay nangipon ra man sad mi sa ilaha. Hangtod na iyang mga kauban maaway nako kay maora man og ilang tabunan. Pero wala sila masayud unsa say side nako.

Karon naa gyuy babaye nga magsige og tawag niya ug nasakpan nako nga mogawas siya ug tubagon. Karon nahimo kong bastos sa pagtuo nakong paraisong sitwasyon. Unsa may buhaton nako?

ERMALYN

Ermalyn,

Tan-aw nako maorag wa man mo makasal. Kon tinuod man, mao nang resulta sa relasyon nga wala pangandami, kon di giuna-una ang lami nga ang bata ana maoy maapektuhan kon bati ang dagan sa inyong relasyon.

Nakasabot ko sa imong side. Dili lalim labi na kon bantay ra ka sa bata permi ug mahanaw ang lambing sa una. Makasamot na sa insecurities, labina di na mao imong panglawas kon itandi sa mga daga nga imong selosan.

Dili sab maayo ang gibuhat sa imong bana. Ubanay ta, iya nanang likayan nang bisyoha kay minyo na man siya ingon tang punga. Lisud sab gyud pugson kon ang usa ninyo walay pagbati. Lisod tun-an kon lawas ray giapas sa sinugdanan para mahigugma. Fairy tale na sa uban. Iampo sa Ginuo nga maka-decide ka kon mobiya ka samtang bata pa ka. Maayo sab kay sa mosamot ang imong pagmahay. Usa sa pagsukod niya nga mahal ka niya sa tinuod mao ang paghagad niya og kasal. Salamat.

PAPA JOE

(sa inyong tampo ipadala lang sa papajoelon@hotmail.ph)