SUPAK si Mayor Michael Rama sa sugyot nga ilisan og pangalan ang Barangay Kamagayan.

Kini taliwala sa daghan kaa­yong isyu nga gipasangil batok sa maong barangay. Isyu sa prostitusyon, drugas ug bisan unsa na lang nga nagbutang sa imahen sa barangay sa kompurmiso. Ang gusto sa mayor mao ang pagpadali sa iyang prog­rama sa reblocking nga gusto niya nga ipahuman sa dili pa matapos kining tuiga. Ubos sa maong programa maglapos lapos ang karsada ug mamulak ang daghang suga.

HAGIT

Sa kadugay na sa panahon nga gidabo dabohan ang Kamagayan sa daghan kaa­yong isyu, panahon na nga seryusohon sa mga opi­­syal ug mga mabuot nga lumolupyo kining programa nga ipatuman sa mayor. Nakaseguro ko nga ang mga lumolupyo nga way labot sa isyu dugay na nga naglungot lungot nga makabaton ug kausaban ang maong dapit. Siguro kadtong nagplano kaniadto nga mopalambo sa ilang negosyo pagtukod og boarding house o pension house mahimong magplano pag-usab. Kay sa higayon nga makompleto na ang programa ni Rama daghan na unya ang makabaton og kompyansa nga mopuyo sa maong dapit. Sa sitwasyon karon kinsa may ganahan nga mangabang ug mahal kung kahadlokan nimo ang imong palibot.

SAPANGDAKO

Angay nga hangpon inay ikaguol sa mga ginika­nan ang hukom ni Mayor Rama pagpabalhin sa klase sa Sapangdako Elementary School ngadto sa barangay hall. Ang panahon karo  dili na gyud masabtan. Ang mga katalagman mokalit lang pagduaw nga dili magsaba. Apil na kining baha nga maoy gikahadlokan sa mayor. Ang giingon sa kadagkuan sa maong eskwelahan nako kaniadto nga magtawganay ra sila sa principal sa bukid. Kon dunay kusog nga ulan sa bukid iyang pahibaw-on ang principal sa Sapangdako aron makabantay sa posibling baha nga masinati. Lisod ang maong paagi. Kay dili sa tanang higayon dunay signal si principal didto sa bukid. Atong awhagon ang mga yutaan sa Sapangdako basin may nahabilin pa sa inyong luna nga kaugbukan og bag-ong eskwelahan.

BARANGAY TAPUL

Gipahibalo ko sa kadagkuan sa Tapul Elementary ug National High School sa dakbayan sa Talisay nga duna nay budget nga gigahin ang national DepEd a­lang sa bungbong sa tulo ka classroom sa high school. Pasalamat ta ning balitaa. Apan dili pa ko mokalawat ini hangtod nga makakita ta og mga trabahante nga magtrabaho didto. Sa mga ginikanan diay nga nisugo sa ilang mga anak pagpangaykay ug masapian sa dumping site sa maong barangay palihug giyahi ninyo ang inyong mga anak nga kini pagpamasura himoon lang kung way klase. Problema ni dili lang sa Tapul. Sa tanang dumping site bisan asang dapita ang DepEd nahasol sa ka-absinot sa ubang mga bata.