DAKONG negosyante na sab ang na­bik­tima sa mamumuno nga walay kurat nga mohunos og kinabuhi. Si Richard King namatay diha dayon human sudla sa kriminal sa iyang building sa Davao City niadtong Huwebes sa gabii.

Walay kulba ang kriminal nga niduol kang King ug midiretso ug posil kaniya ginamit ang 45 kalibre. Human nahagba si King, yano ra ang kriminal nga migawas sa building ug misakay sa motorsiklo.

Duha ka mga suspek ang gipangita sa kapolisan. Una mao ang gunman ug ang ikaduha mao ang driver sa motorsiklo. Samtang wala pay kasayoran ang kapolisan kon kinsay mastermind sa mao nga kaso.

Gihulagway sa mga testigo nga ang gunman nagpangedaron og mga 30 anyos ug wala nagtabon sa iyang nawong. Nagduda ang kapolisan nga gun for hire ang kriminal.

Daghang mga anggulo ang gisubay sa kapolisan. Apil sa gitan-aw nga mga anggulo mao ang bangi sa negosyo, personal nga kontra ug ang love triangle.

Naila si King gumikan sa mga negosyo niya nga motel ug hotel. Diri sa Sugbo, misibaw usab ang iyang mga pangalan human niya gikasungi ang pipila ka mga negosyante, huwes, ug mga dagkong opisyal sa gobiyerno.

Anaa na sa kapolisan ang bola sa pagsulbad sa kamatayon ni King. Ang gusto lang sa publiko nga kon dili man gani masanta, bisan mamenusan na lang ang mga kaso nga pagpatay ginamit ang mga gun for hire.

Ang mga gun for hire mao ang gianggaan og professional killer kansang serbisyo mao ang pagpatay og tawo. Sila nabuhi pinaagi sa pagpatay og kinabuhi.

Daghan nang ilang mga nabiktima nga naglakip sa mga tigbalita, mayor, huwes, abogado ug negosyante. Hangtod kanus-a man molurang ang ilang kabangis sa pagpaagas sa dugo sa ilang mga biktima?

Angay nga mohimo na og mas maayo pang pamaagi ang kapolisan aron kapa­nalipdan ang matag kinabuhi. Mohimo ang kapolisan og taktika sa pagsikop sa mga gun for hire ug sa pagbungkag sa ilang sindikato, kana kon sindikato na kining ilang pagpatay ug tawo.

Kabahin sa dakong puhunan sa matag lugar sa nasod aron mouswag ang negosyo mao ang kahapsay ug kalinaw. Ang negosyante dako og pagsalig nga mobutang sa iyang negosyo sa lugar nga malinawon.

Apan sa ingon ani nga nagsunodsunod na ang pagpamatay, makahulga kini sa mga negosyante. Maghinuktok ang mga negosyante kon ang ilang kinabuhi ug ang patigayon luwas pa ba batok sa mga kukhan nga kriminal.

Unta, mahatagan og hustisya ug madakpan ang tinuod nga kriminal ni King. Konsuwelo kini sa mga negosyante nga walay diay nagtanga ang kapolisan.