Tunghaan gidasig nga mokampanya sa pagrehistro

WAY mobarog bisan usa nga molupyo sa Barangay Pulangbato nga magtumbok sa upat ka personnel sa Talamban police station nga protector sa ilegal nga drugas.  

Gani, mismo ang hepe sa Talamban police station nga si P/SInsp Bienvenido Miral nangunay sa gihimong evaluation ug nisusi kon makatumbok ba sila sa iyang sakop nga tigdawatan og payola gikan sa mga drug pusher. Giingong pulos ra pasangil ug way konkretong ebidensya nga gipakita ang ilang gikuhaag pamahayag ug tungod niini maglisod sila sa pagkombinser ug pagpasaka unya og kaso batok sa mga pulis.

Giangkon hinuon niya nga way makuha nga dagkong pusher sa Pulangbato ug sa silingang barangay tungod sa iyang pagtuo nga dunay pulis nga mohatag og impormasyon sa mga nalambigit sa ilegal nga kalihokan sa dapit.

Gumikan sa isyu ug paglambigit sa giingong 20 ka mga pulis sa Talamban, ubos kaayo karon ang moral sa iyang mga sakop sanglit pipila lang ang iyang gitumbok nga nagbinuang itandi sa mga tarong nga pulis.

Samtang, nihimo karon og fact-finding team ang Cebu City Police Office pinangulohan ni P/SSupt. Noli Romana aron maoy motutok sa imbestigasyon sa kaso sa kapulisan sa Talamban aron masusi unsa ka tinuod ang pasangil. Gusto ni Romana nga di lang magbase sa usa ka tawo ang imbestigasyon ug maayo nga ang tanang tawo sa usa ka barangay maoy pangutan-on.

Niadtong Hunyo 2 atol sa Police Coordinating and Advisory Council (PCAC) meeting didto sa Talamban, gitumbok ang kapulisan nga hinungdan nganong di masulbad ang problema sa ilegal nga drugas tungod sa giingong pagpanalipod niini sa ilegal nga kalihokan.