GIKATAHO nga sapa sa Barangay San Roque, dak­bayan sa Talisay ang giingong gitambakan og anapog.

Si Bise Mayor Romeo Villarante naalarma sa ta­ho ug gikatakda nga mo­awhag sa konseho ug ni Mayor Johnny delos Reyes sa paghimo og lakang sa paghunong sa pagtambak sa sapa nga gihimo sa pribadong tawo o kompaniya.

Ang mga molupyo sa barangay San Roque nga naglangkob sa tulo ka mga sityo sa San Rafael, Salvedo, ug Sawsaway nagpalaban sa Sun.Star Superbalita human ang sapa sa ilang lugar nga nagdugtong sa dagat sa South Reclamation Project (SRP) gitambakan og

anapog ug nigamay na ang gilapdon sa sapa nga kaagian sa agos sa tubig.

Ang tubig sa sapa gikan usab sa ubang barangay sa Talisay nga mipai­ngon sa maong suba una pa motipon sa paghaw-as sa da­gat sa SRP.

Gikataho nga gibinlan lang og 8.5 meters nga gilapdon ang sapa sa pagtambak sa anapog.

Ang bise mayor nabalaka sa kahimtang sa mga lumolupyo nga mabutang sa peligro ang ilang kinabuhi ilabi na sa Barangay Tang­ke nga maoy kasikbit o tupad nga barangay.

Matod ni Villarante nga iyang pakigkitaan ang ma­yor ug ipatawag ang mga tawo nga nalambigit niini.

“Maayo matan-aw ni sa engineering and whole area before mo-pursue sa project kon safe,” matod ni Bise Mayor Villarante nga nahinabi sa Sun.Star Superbalita.

Iyang gipasabot nga adunay katungod ang siyudad sa pagpahunong niini bisan og kini gipanag-iya sa pribado tungod kay agianan man sa tubig ang lugar.

“Katunggan na kaniadto unya nabalhin ang agianan sa tubig tu­ngod sa filling sa SRP road. Unya naghimo og lain agianan ang DPWH, mao na ang bridge bet­ween Cebu City and Talisay,” dugang ni Villarante.

Sama sa gihapon gustong susihon sa bise ma­yor ang gilapdon sa tubig unya nga maagian ilabi na kon magpadayon nagpagtambak og anapog.

Sa miaging adlaw, si Villarane nisusi sa lugar uban sa tulo ka mga konsehal sa siyudad pinangulohan ni Konsehal Antonio Bacaltos Jr., Chairman sa Committee on Environment and Na­tural Resources, ug sila si Konsehal Aldin Diaz ug Konsehal Dory Emit.

Si Bacaltos niingon nga iyang susihon kon nga­nong natitulohan ang maong lugar nga usa man kini ka sapa.

Gusto usab nga susihon sa duha ka mga konse­hal nga sila si Emit Diaz kon nakakuha ba silag Environmental Compliance Cer­tificate (ECC) sa Depart­ment of Environment and Natural Resources (DENR) sang­­lit sigun sa ilang nasayran wala kini ECC.